Диана Доктугу биле Алибек Монгуш – Россияның алдарлыг спорт мастери болгаш тренери болганнар

Тыва Республиканың күш-культура болгаш спорт талазы-биле 2022 чылда түңнелдерин Улусчу чогаадылга бажыңынга эрткен «Спортчу элита-2022» байырлыг кежээде демдеглээн.

Аңаа Россияның Спорт яамызының дужаалы-биле «Россия Федерациязының алдарлыг спорт мастери» деп хүндүлүг атты республиканың олимпий курлавырларының «Олимп» спорт школазының кикбоксингиге тренери Диана Доктугуга бедик спортчу чедиишкиннери дээш тывыскан.

Ол ышкаш, ам бо хүнде Тываның чыынды командаларын белеткээр төптүң кикбоксингиге кол тренери, ооң тренер-башкызы Алибек Андреевич Монгушка «Россия Федерациязының алдарлыг тренери» деп хүндүлүг атты хөй чылдар иштинде ак сеткилдиг ажыл-ижи болгаш бедик спортчу чедиишкиннери дээш база тывыскан.

Ол дугайында Россияның алдарлыг тренери Алибек Монгуш тодаргай тайылбырны берген:

«Бөгүн дыка өөрүнчүг хүн болду. Чүге дээрге Россияның алдарлыг тренери деп хүндүлүг атты меңээ тывысты. Ол дээрге Диана Доктугу-биле 18 чыл иштинде кады белеткенип, аңгы-аңгы чергениң маргылдааларынга киржип келгеш чедип алган чедиишкинивис болур. Диананы школачы үелеринден тура белеткеп келгеш, аштырыышкыннарга-даа таваржып турдувус, удаа-дараа тиилелгелер-даа турган.

Диана 2005 чылда школачылар аразынга Россияга чемпионнап каан соонда, ону Тываның күрүне университединиң күш-культура салбырынче шылгалдалар чокка хүлээп алган. Ол 2011 чылдан тура Россияның улуг улус аразынга чемпионаттарынга шаңналдыг черлерни ап эгелээн. 2013 чылдан эгелээш Россияның 5 дакпыр чемпиону болган.

2013 чылда Бразилияның Сан-Паулу хоорайга Делегей чемпионадынга киришкеш бир дугаар чемпион болган. Тыва херээжен спортчулар аразындан бир дугаар Делегей чемпиону атты чаалап алгаш, Тываның төөгүзүнче бодунуң адын алдын үжүктер-биле киир бижээн деп болур. Аңаа өөрээн чаңгыс чер чурттуглары, Улуг-Хем чону аңаа «Лада-гранта» автомашинаны белекке база берген турган.

2015 чылда Сербияның найысылалы Белград хоорайга Делегейниң ийи дакпыр чемпиону болган. Аңаа 2016 чылда Россияның Спорт яамызы «Россияның делегей чергелиг спорт мастери» деп хүндүлүг атты тывыскан».

Алибек Андреевичиниң чугаазы-биле, ооң соонда, элээн үе эрткенде Диана Доктугу бичии кыстыг болган. Ниитизи-биле 6 чыл дыштангаш, эрткен, 2021 чылда Италияга болган Делегей чемпионадынга 2-ги черни ап, мөңгүн медальды чаалап алган соонда, Россияның алдарлыг спорт мастериниң нормазын күүсеткен.
«Мээң өөреникчим, ам коллегам болур тренер башкы Диана Доктугуга бөгүн «Россияның алдарлыг спорт мастери» деп бедик атты база тывысканы биске ийи дакпыр өөрүшкүлүг хүн болду!» – деп, Россияның алдарлыг тренери Алибек Монгуш онзалап демдеглээн.

Диана Доктугу биле Алибек Монгуштуң 18 чыл иштинде кызыл дерин төп чорааш чедип алган чедиишкини – Россияның алдарлыг спорт мастери болгаш алдарлыг тренери деп хүндүлүг аттарны чаалап алганы, Тыва спорттуң 2022 чылда чедип алган база бир чайынналчак чедиишкини болур.

Мерген КЫРГЫС.
Авторнуң тырттырган чуруу.