Тываның ветеринария албанының специалистери онза айыылдыг аарыглардан малдың баш санын камгалаар дээш, күжениишкинниг ажылдап турар. Ветеринария албанының медээлеринден алырга, 2026 чылдың эгезинден тура 26 муң ажыг малга тарылганы чоруткан. Специалистер фермаларда, турлагларда болгаш дузалал ажыл-агыйларында инфекциялардан «дириг камгалалды» тургуспушаан ажылдап турар.
Амгы үеде регионда ветеринарлыг болгаш санитарлыг байдалды чедимчелиг деп санап турар. Халдавырлыг аарыглардан массалыы-биле аараан база хөй мал кырылган таварылгалар илеревээн. Ындыг-даа болза Россия Федерациязының девискээринде дүшкүүрлүг байдалды өөренип көргеш, регионда сагындырыглыг болгаш хыналдалыг хемчеглерни уламчылап турар.
Чижээ, 6 муң баш бода малды ящурга удур, 1800 баш малды — эмзематозтуг карбункулдан база 100 хире баш малды калчаа аарыынга удур тараан. 10200 ажыг баш шээр малга (хой, өшкү) ящурга удур, база 2 муң малга сибирь язвазынга удур вакцинаны салган. Чылгы мал аразынга сибирь язвазынга удур (180 баш аът) база трихофитияга удур (4 баш малга) тарылганы кылган.
Ооң-биле чергелештир азырал амытаннарга иммунизация талазы-биле ажылды база чорудуп турар. Мал эмчилериниң чугаазы-биле алырга, калчаа аарыы ышкаш айыылдыг аарыг-биле демисел чорудар кол чадазы-дыр. Бо хүнде 2500 хире ытка база 500 хире дииске калчаа аарыынга удур тарылга чоруткан. Ол ышкаш 45 азырал дириг амытанга сарыг думаага (чума) удур вакцинаны салган.
«Вакцинация — хөй мал кырлырын база кижилерниң кадыынга айыылды тургузарын чедирип болур аарыгларны өөскүдерин болдурбас эң-не бүзүрелдиг чаңгыс арга-дыр. Ветеринария албаны ыраккы турлагларже үнүүшкүннерни кылып база чогуур хемчеглерни чорудары-биле шупту аргаларны ажыглап турар» — деп, ук албан дыңнадып турар.
Күрүнениң ветеринария албанында эм-таң болгаш биологтуг препараттарның курлавыры чедер. 2026 чылда ниитизи-биле 699604 муң шинчип тодарадыр ажылдарны чорударын планнаан.
Ветеринарлар малдың ээлерин боттарының малын тарыдып алырын кыйгырып турар.
Бистиң корр.
ТР-ниң Чазааның медээзи болгаш чуруу.