“ДИРИГ ЧАНЫП КЕЛИҢЕР!”

Шеригже долу эвес мобилизация.

Россияның Украинада чорудуп турары тускай дайынчы операцияга киириштирери-биле долу эвес мобилизация ёзугаар шеригже келдирткен бөлүк чаңгыс чер-чурттугларын Чеди-Хөл кожууннуң чурттакчылары үдеп чоруткан.

Кымнарны шеригже кыйгыртканы билдине бээрге, Чеди-Хөл кожууннуң чурттакчылары Украинада чорудуп турары тускай дайынчы операцияга киржир чаңгыс чер-чурттугларынга гуманитарлыг дуза чыгганнар. Чылыг уктар, иштики хеп, сапык идиктер, дуглалчак чоорганнар, рюкзактар, эмнер, дүрген эмчи дузазының аптечкалары дээш дайынчы хөделиишкиннер үезинде шериг кижиге херек идик-хепти болгаш эп-септи садып чыып бергеннер.

Долу эвес мобилизация-биле дайынчы операцияже келдирткеннерни үдеп тура:

— Бурган өршээзинде дириг чанып келиңер! – деп, Чеди-Хөл кожууннуң чагырга даргазы Адыгжы Араптан чугаалаан. – Силерни чаш ажы-төлүңер, чоок кижилериңер, өг-бүлеңер манап артып каан.
Россияның Украинада чорудуп турары тускай дайынчы операцияга киириштирери-биле шеригже келдирткеннерни ажы-төлү, өг-бүлелериниң ишти, төрелдери үдеп тура, дайынчы хөделиишкиннер үезинде боттарын карак кызыл камнап-камгалап чоруурун чагып турганнар.

Чеди-Хөл кожуун чагыргазының медээлеринден белеткээн