Бөгүн, август 15-те, Тыва Республика хүнүнде, ТАР-ныӊ тургузукчузу Буян-Бадыргы ноянныӊ найысылал Кызыл хоорайда тураскаалынга мөгейип, чүзүн-бүрүн өӊнерлиг дириг чечектер салырыныӊ байырлыг ёзулалы болуп эрткен.
Аңаа ТР-ниң Баштыңы Владислав Ховалыг, Тыва Республиканың Дээди Хуралдың Даргазы Каң-оол Даваа болгаш өске-даа удуртукчулар, сайыттар киришкен. Байырлыг езулалга аңгы-аңгы албан черлериниң ажылдакчылары, хөй-ниитижилер, идепкейжилер дээш кижи дыка хөй болган.
Тываныӊ Баштыӊы Владислав Ховалыг Тыва Арат Республиканыӊ үндезилекчизи Буян-Бадыргы ноянга мөгейиг езулалынга хамаарышпас күрүнениӊ Тываныӊ төөгүзүнге турганы тыва улустуӊ төөгүзүнде улуг ниитилел-политиктиг болуушкун деп демдеглээн.
Тыва Арат Республиканы үндезилеп тургузарынга Тываныӊ орус чурттакчы чонунуӊ киржилгезин Владислав Ховалыг демдеглеп, тыва болгаш орус улустарныӊ оглу Иннокентий Сафьяновтуӊ ТАР-ны тургузарынга хууда ужур-дузазын онзагайлап айыткан.
«Россияның шупту регионнарының шериглери-биле бистиң чаңгыс чер чурттугларывыс бо хүннерде төрээн черивисти камгалаар дээш, октуг боону холда туткан тулчуп турар. Олар эрес-дидим маадырлыы-биле чуртувусту камгалап турда, чаңгыс чер чурттугларывыска материалдыг деткимчени көргүзүп, патриотчу чоруувусту ажыл-херек кырында бадыткап турарывыс ол.
Бергелерге торулбайн, регионувустуң экономиктиг сайзыралын бедидип, чоннуң социал байдалын экижидер сорулга-биле бүгү күжүвүстү үндүрүп турар бис. Бергелерни ажып эрткеш, эрткен төөгүвүстү утпайн, сактып, ону хүндүлеп, эртем-билиглиг, чырык угаанныг кижилер болурунче чүткүп, салгалдарывыска төлептиг келир үени арттырып каар болзувусса, Буян-Бадыргының күзелин бүдүргенивис ол» - деп, ТР-ниң Баштыңы Владислав Ховалыг чугаалаан.
А. Ондар.
Ада Тюлюштуң тырттырган чуруктары.