Диш аарыыры кайы хире аарышкылыг болгаш хилинчектиин, диш эмчилериниң хүлээп алыышкынынга кирип алыры чүү хире бергезин барык кижи бүрүзү билир. Тываның найысылалы Кызыл хоорайның стоматология поликлиниказынга безин дижи аараан кижини хүлээп алырының ээлчээниң хуусаазы бир ай чедип турган.
Ам байдал шуут өскерилген деп болур. Республиканың Кадык камгалал яамызының медээлери ёзугаар алырга, дижи аараан кижи бодунга эптиг үеде, Тываның кайы-даа кожуунунга диш эмчизиниң хүлээп алыышкынынга бижиттирип ап болур. Диш эмнелгезиниң регионда бар шупту кабинеттерин чаңгыс аай стоматология төвү кылдыр каттыштырган түңнелинде, ындыг эптиг байдал тургустунган.
Бо чылдың эгезинден бээр үеде стоматология поликлиниказынга 12 диш эмчизи ажылдап кирген: 6 эмчи улуг кижилерниң, 6-зы ажы-төлдүң диштерин эмнээр. Кызылдың школаларында сес стоматология кабинеди ажылдап турар, оларның ийизи бо чылын ажыттынган.
«Диш эмнелгезин бо чылдың февраль айда төпчүдүп эгелээн бис. Чаа төпке кожууннарда сес, хоорайларда үш диш кабинеди каттышкан»— деп, стоматология поликлиниказының кол эмчизи Аян Хайжок дыңнаткан.
Барыын-Хемчик кожуунда улуг улустуң, бичии уругларның ийи чаа кабинеди ажыттынган. Тожуда база диш эмнелгезиниң кабинеди бар апарган, бо ырак-узак девискээрниң чурттакчылары аараан диштерин эмнедип алыры-биле Кызыл хоорайже келбес, кожууннуң бодунда диш эмчизиниң ачы-дузазын ап болур.
Регионда бар шупту диш кабинеттерин чаңгыс аай стоматология төвү кылдыр каттыштырганы стоматология эмнелгезиниң курлавырын долузу-биле ажыглаар, аарыг кижилерниң диш эмчилеринге кирип алырының ээлчээн болгаш хуусаазын кызырар арганы бээр. Чижээлээрге, бир кожуунда стоматолог эмчи шөлээлеп азы аарый бээр болза, диш аарыг кижи өске кожуунда стоматологтуң хүлээп алыышкынынга кирип, эмнедип болур.
2023 чылда стоматология поликлиниказы 160 муң хире улуг кижилерге эмнелге ачы-дузазын чедирген болза, бо чылдың эрткен 9 айларында 70 муң кижини хүлээп алган.
«Күрүне ачы-дузазы» портал дамчыштыр эмнедир эмчизин болгаш эптиг үезин шилип, диш эмчизиниң хүлээп алыышкынынга бижиттирип алыр, ээлчег манап олурар херээ-даа чок апарган-дыр» — деп, Надежда Завьялова чаа чүүлге дыка таарзынып турар.
Диш кабинеттерин чаңгыс аай стоматология төвү кылдыр каттыштырганы эмчилерге-даа, дижи аараан кижилерге-даа эптиг байдалды тургузар.
ТМГ-ниң медээзинден Ш. МОНГУШ белеткээн.
Чуруктарны "Тывамедиабөлүктен" алган.
“Шын” №81 2024 чылдың октябрь 23