Дмитрий Крапивин: "Тууйбу заводу чонга таарымчалыг байдалдарны тургузар".

Тывада тууйбу бүдүрер заводтуң модернизастаашкын эрткенинге хамаарыштыр бодунуң бодалын «Энергострой» КХН-ниң директорунуң оралакчызы Дмитрий Крапивин илереткен:

“Тывага тудуг материалдары черле нарын айтырыгларның бирээзи турган болгай. Колдуунда Саян артындан садып ап, орук чарыгдалдарынче хөй акша-хөреңгини үндүрер ужурга таваржыр. Ынчангаш Кызылда, мыя бо Вавилинский ээтпээнде тууйбу заводунуң күчү-күжүн улгаттырып кааны канчаар-даа аажок эки медээ деп санап тур мен. Ылаңгыя ол девискээрде чонувус калбаа-биле бажың-балгат туттунуп турар болгай. Бо эрткен чылдарда боттарының ажыл-агыйжызын бадыткап шыдапкан “Сенги” КХН-ниң тууйбу заводу тудуг материалдарының өртек-үнезинге эки салдарны чедирип, чонга таарымчалыг байдалдарны тургуза бээринге бүзүрээр мен”.