Россия Федерациязының Президентизиниң “Россия Федерациязынга долу эвес мобилизацияны чарлаар дугайында” Чарлыын күүседир талазы-биле чугула айтырыгларны тодарадыры-биле Тываның Баштыңы Владислав Ховалыг бо хүн Чазак деңнелинге чөвүлел хуралды эрттирген.
“Тыва Республиканың девискээринге долу эвес мобилизацияны чарлаар дугайында” Дужаалды Тыва Республиканың шериг комиссары 2022 чылдың сентябрь 21-де үндүргенин сагындыраал. Бо хүн Тываның шериг комиссары Д. Артына чогуур тайылбырны тыва журналистерге берген. Ооң тайылбырлааны-биле, ук дужаал езугаар Тыва Республиканың девискээринде доктаамал чурттап турар шериг хүлээлгелиг хамаатыларны долу эвес мобилизацияже келдиртириниң чурумун тодаргайлаан.
Ооң-биле кады долу эвес мобилизацияже келдириишкинге айыткан хуусаада келбээни дээш шериг хүлээлгелиг хамаатыларның харыысалгазын база айтып тайылбырлаан.
Долу эвес мобилизацияже келдирткен шериг хүлээлгелиг хамаатыларны оларның ажылдап турары организацияларның организас-хоойлу болгаш өнчү хевиринден хамаарылга чокка ажылындан хостаар ужурлуг, оларның акша-шалыңын долузу-биле санап бээр, келдириишкинде айыткан хуусаада шериг пунктуларынга чедирер чурумун база айыткан.
Республиканың шериг комиссарының Дужаалын шупту организацияларга чарлап дыңнадыры көрдүнген.
ДОЛУ ЭВЕС МОБИЛИЗАЦИЯ
22 сентября 2022
32