Долу эвес мобилизация - Тываның Баштыңының кичээнгейинде

В. Ховалыг:
- Кызылда долу эвес мобилизация-биле чыыш болгаш дыңнадыглар найысылалдың шериг комиссариадының баазазында эрттип турар. Ийи тур каданың пунктузун база тургускан. Бирээзи - Тываның тудуг техникумунда, өскези – Тываның транспорт техникумунда.
Амгы үеде мобилизацияже келдирткен улусту, оларның аразында кожууннардан хамаатыларны база 55-ки мото-адыгжы (даг ) бригадазында чыттырган. Олар аңаа өөредиглиг шериг белеткелин эрттер. Далаш, буу-хаа кымны-даа региондан дашкаар чорутпайн турар.
Дыңнадыглар, кыйгыртыышкын чедирилгелери, чыыштар эгелей берген-даа болза, даңзы ёзугаар оларны шүүштүрер ажыл уламчылап турар. Бир эвес, ол мөөңнээшкинден хостадып болур хире чугула документилерлиг улус болза, чурттап турар чериниң аайы-биле шериг комиссариадынга дарый чедирип бээр болза эки. Россияның Президентизиниң сентябрь 24-те “Мобилизация болгаш шериг албанынче келдиртилгеден хостаарының дугайында” Дужаалга ат салган болгай. Ынаар кичээнгейни салып, мөөңнээшкин үезинде частына берген таварылгалар туруп келзе, 122 дугаарлыг “изиг шугумче” дораан долгаарын дилээр-дир мен - деп, Тываның Баштыңы Владислав Ховалыг дыңнаткан.