Тываның Баштыңы Владислав Ховалыг республикада туттунган чаа спортчу объектилер дугайында бодунуң блогунга бижээн:
— Кожууннарның удуртукчулары-биле үргүлчү ужуражылгаларны эрттирип турар мен. Шак-ла мындыг ужуражылгалар республиканың чидиг айтырыгларын илередип тыварынга дузалаар. Эң-не салдынар айтырыгларның бирээзи — амгы үениң спортчу объектилериниң тудуу.
Ол айтырыгларны чада аайы-биле, инвесторларның курлавырларын киириштирип тургаш, шиитпирлээрин кызыдып турар бис. Эрзин кожуунга эрткен чылын күш-культура болгаш спорт залын ажыткан. Ук объектини «Эльбрусметалл-Литий» компанияның деткимчези-биле туткан. Амгы үеде зал кожууннуң спортчу амыдыралының төвү болган, тус черниң аныяктарының чаагай чоруу дээш ажылдап турар.
Ыраккы Тожу кожуунда спортчу объектилер талазы-биле байдал чи- диг — кожуун төвү Доора-Хемде ам-даа спорт залы чок. «Ареал» компанияның удуртулгазы-биле ол айтырыгны сайгарып чугаалаштывыс. Түңнел бар: бистиң бот-идепкейивисти инвестор деткиди. Доора-Хемге амгы үениң спортчу объектизи туттунар! Республиканың эң-не ыраккы булуңнарының ажы-төлүнге безин тренировкалаарынга таарымчалыг байдал турар ужурлуг.
Бистиң девискээрлеривистиң хөгжүлдезинге социал харыысалгазын болгаш улуг үлүүн киириштирип турары дээш, партнёрларывыска өөрүп четтиргенимни илередир-дир мен!».
Бистиң корр.
Чуруктарны Тываның Баштыңының телеграм-каналындан алган.
“Шын” №8 2026 чылдың март 5