Өөредилге яамызы доозукчуларның байырлыг кежээзин эрттирериниң чурумун бадылаан. Июнь 20-де 9-ку класстың доозукчуларынга аттестат тыпсыр, а июнь 24-те 11-ги класстың доозукчуларынга байырлыг кежээ хемчеглери болуп эртер. Байырлыг кежээ 22.00 шакка чедир доозулган турар ужурлуг дээрзин Өөредилге яамызы дыңнадып турар. Оон ыңай, яамы ук хемчеглерниң чорудуунуң дугайында методиктиг арга-сүмелерлиг документ-саавырны үндүрген.
Документ ёзугаар, байырлал үезинде айыыл чок чорук дүрүмнерин хайгаараары-биле ада-иелер, шагдаалар болгаш эмчи ажылдакчылары турар. Ол ышкаш байырлыг хемчегни ресторан, кафелерге эрттирери, ада-иелерден акша чыыры, эзиртир суксун ижери, өрт айыылының баш удур болдурбас чурум үезинде, арга-арыгже, хемнер-хөлдерже агаарлап үнери хоруглуг, агаарже салют чазылдырары база хоруглуг.
Школада 11-ги класстың доозукчулары 10 кижиден эвээш болза, кожуун төвүнге чаңгыс аай доозукчу кежээлерни эрттирип, школа автобустары-биле аай-дедир чедирер.
Чурукту интернет четкизинден алган.