Саян сыннарының кырынга, Тываның тайгаларының баштарынга башкы хар сентябрь ортаа үезинде чаапкан. Мөңгүн-Тайга кожуунда Каргы хемниң бажынга, Мөген-Бүренге чаапкан харны көргүскен фото болгаш видеоматериалдар социал четкилерде ону бадыткап турар.
Кызыл биле Абакан аразында автомобиль оруунда Саян арт кырында база хар чагган. Саян арттың бедии 2 муң 214 метр. Сибирьде бо арт эң-не бедик, а Россияда бедик арттарның бирээзинге санадып турар. Саян арттан бедик арттар чүгле Кавказ дагларында.
Р-257 федералдыг автоорукта Саян арт эң-не берге участок. Тыва Республика талазы-биле Иштики херектер яамызының Күрүнениң автоинспекциязының ажылдакчылары Кызыл биле Абакан аразында чоруп турар чолаачыларга машиналарының чайгы дугуйларын кышкы дугуйларга дарый солуп алырын шыңгыызы-биле сүмелеп турар.
Агаарның температуразы 7 градус чылыг апаарга-ла, чайгы дугуйларның резиназы чымчак шынарын чидирип, асфальтыга тайгыр апаар. Тываның агаар-бойдузунуң берге байдалынга хүндүс чылааш, дүне сооп, оруктарга чуга доштар тыптып, автомобильге айыылдыг апаар.
Демир «аъттарга» кышкы «идиктерни» кетсир үе келген. Чайгы дугуйларны, кышкы дугуйлар-биле солууру – оруктарга айыыл чок чоруурунуң магадылалы!
Ш. МОНГУШ.
Чурукту интернет четкизинден алган.
“Шын” №71 2024 чылдың сентябрь 18