Январь 5-те Өвүр кожууннуң Дус-Даг суурга чаа эмнелге амбулаториязының байырлыг ажыдыышкыны болган. Ол “Кадык камгалал” национал төлевилелдиң бирги звенозун чаартыр программа-биле туттунган.
Тус черниң салым-чаяанныгларының концерти болгаш шаңналдар тыпсыр ёзулал бо болуушкунну улам-на каастап турган. Кадык камгалал сайыдының оралакчызы Орлан Ондар суурнуң чурттакчы чонун чаа үнүп келген 2025 чыл болгаш амгы үениң негелделеринге дүүшкен чаа амбулаторияның ажыдыышкыны-биле байырын чедирген.
“Чаа үнүп келген 2025 чылда Дус-Дагның эмнелге амбулаториязы бодунуң төөгүзүнде чаа арынны ажыткан. Ук оран-савада чурттакчы чонга эмчи дузазын чедиреринге, диспансеризацияны болгаш кожууннуң төп эмнелгезиниң азы республиканың тускай угланныышкынныг эмнелге албан черлериниң эмчилеринден арга-сүме алырын организастаар эптиг байдалды тургускан” – деп, Орлан Ондар демдеглээн.
Тыва Республиканың Кадык камгалал яамызының медээлеринден белеткээн.
Чуруктарны интернет четкизинден алган.
Дус-Дагда чаа эмнелге амбулаториязы ажыттынган
5 января 2025
11