Тускай шериг операциязынга киржип чоруткан чаңгыс чер-чурттугларывыска ачы-дуза чедирер ажыл уламчылап турар. Орук ажыл-агыйында улуг дээн бүдүрүлге чери «Восток» КХН-ниң удуртукчузу Сергей Уюсов организациязының мурнундан кандыг дуза чедиргенинге хамаарыштыр медеглелди кылган:
«Бо хүнде организациявыстан 16 кижини долу эвес мобилизация-биле аъткардывыс. Бис федералдыг орукту харыылап турар болганывыста, бисте кыйгыртыышкындан хостадыр арга бар, ынчалза-даа 14 кижи кыйгыртыышкынга таварышканы бо. Оларның көвей кезии боттарының күзели-биле чорупканнар. Дайынчы арга-дуржулгалыг, десантниктер. Ажылдакчыларывыска ачы-дуза чедирер аргаларны көрген бис, херек чүүлдер садып алыр кылдыр материалдыг дузаны көргүстүвүс. Харын-даа, бисте ажылдавайн турар бир кижи келгеш, эки турачы болуп чоруур деп турарын чугаалааш, кыйгыртыышкынын көргүскеш, материалдыг дуза көргүзерин дилээн таварылга база бар. Ол кижиге дузаны база чедирген бис. Оон аңгыда квадрокоптер-биле профессионал деңнелге ажылдап билир кижиге квадрокоптер садып берип, дузалашкан бис.
Ниитизи-биле ачы-дуза чедирер ажыл тускай организастаттынган турар ужурлуг. Дуза кадарының аргалары хөй янзы болгай, а бистиң мурнувуска боттарывыс бот-тускайлаң дуза чедирер бе азы Тываның Чазааның даалгазы-биле саң-хөө деткимче чыып, шериглерге херек чүүлдер садып ап, чорудуп турар «Деткимче» фондузун дамчыштыр дузалажыр бе деп айтырыг тургустунуп келген турган. Фонд акшаны мөөңнеп чыып турар боорда, шериглерге чүнү садарын ылап билир болгай, ынчангаш ук фонд дамчыштыр ачы-дуза чедирерин шиитпирлээш, акша дузаламчыны шилчиткен бис.
Республикада мобилизастаттынган оолдарывыска-даа, тускай шериг операциязында шериглеривиске-даа, оларның Тывада артып калган өг-бүлелеринге-даа ачы-дуза чедирилгези чаа-ла эгелеп турары бо деп билип турар мен, ажыл ам-даа уламчылаар. А бис хуувуста дөмей-ле чонувуска болгу дег дузаны чедирерин уламчылаар бис».
Чуруктарны интернеттен алган.
Дуза чедирерин ам-даа уламчылаар бис.
3 октября 2022
37