Дуза кадар күзелдиглер хөй

ТывКУ чаа хүрээниң ажыдыышкынының белеткел ажылынга идепкейлиг дузалажып турар.

Буянныг үүлеге киржир күзелдиг кижилер хөй дээрзин ТывКУ-нуң медиа албаны дыңнадып турар. Дуза кадары – кижиниң база бир чугула болгаш күштүг шынарларының бирээзи дээрзин ТывКУ-нуң сургуулдары бадыткап турар.

Будданың өөредиинде бүгү амылыгларга дуза кадар сеткилди метта деп адаар. Дузааргак болгаш кээргээчел кижини бүрүнү-биле аас-кежиктиг деп санаар.

Сургуулдар хүрээже ыдыктыг судурларны салыр ховар болуушкунга киржир аас-кежиктиг болганнар.

«Ооң дириг херечизи болуру биске чогумчалыг болгаш буянныг чаагай үүле болду. Онзагай болгаш ханы уткалыг ёзулалга киржип, эът-кеживис чымырт кыннып, өөрүдүвүс. Дыка аас-кежиктиг-дир бис» – деп, культурология эртеминиң кандидады, ТывКУ-нуң Буддология болгаш тибетология төвүнүң удуртукчузу Чойган Санчай демдеглээн.

Лама башкыларның чугаазы-биле, ыдыктыг судурларны VIII-ки Камбы-лама Джамбел Лодой Индияда Гоман хүрээзинден элээн каш чыл бурунгаар албан-биле чаа «Тубтен Шедруб Линг» хүрээзинге дээш чалап эккелген турган (Хүндүлүг башкы 44 харлыында 2020 чылда июнь айда коронавирустан аарааш бурганнаан). Индияның аалчылар бажыңынга шыгжаан турган ыдыктыг судурларны чүдүкчү чон бичиилеп Тываже эккелген.

ТывКУ-нуң башкылары болгаш сургуулдары Тубтен Шедруб Линг хүрээзин апрель 28-ке чедир бадылаан ээлчег ёзугаар аштап чуп турар.

Хүрээниң байырлыг ажыдыышкыны апрель 28-те болуп эртер. Ону дорт дамчыдылга таварыштыр көрүп болур. Найысылалга база интернетке дамчыдылганы көргүзер. Хоорайның кол шөлүнге электроннуг улуг экранны тургузар. Хүрээниң ажыдыышкынының хүнүнде ону чорудары чугула дээрзин Камбы-лама Гелек Нацык-Доржу болгаш Тываның Баштыңының чөвүлекчизи Игорь башкы дыңнаткан.

ТывКУ-нуң медээзи-биле А. ДОНГАК белеткээн.