Декабрь 5-тиң хүнүнде Волонтерлар хүнүн демдеглеп эрттирип турар. Ук байырлалды 1985 чылда демдеглеп эгелээн. Россия эки турачылар байырлалын демдеглээри-биле 2017 чылда каттыжып келген. Ону делегейниң хөй-хөй чурттарында байырлап турар.
Волонтерлар дээрге боттарының күзели-биле хөй-ниитиниң бүгү-ле амыдыралынга дузалажып чоруур кижилер. Аңаа үлүг-хуузун идепкейлии-биле киириштирип чоруур улусту демдеглевестиң аргазы чок. Амгы үеде ажылындан, өөредилгезинден хостуг үезинде, бүдүн ажыл хүнүнүң-даа дургузунда, чаңгыс катап азы доктаамал ачы-дуза кадары-биле кирип ап болур хөй-ниитиниң албан черлери кайы хөй. Кол-ла чүве — харыы манавайн, кижилерге күзелдии-биле дузалажыры.
Декабрь 8-тиң хүнүнде найысылал Кызылга Аныяктар өргээзинге Волонтерлар хүнүнге тураскааткан республика чергелиг волонтёрлар балын эрттирген. Ук байырлалды Тывада бир дугаар эрттирип турары бо. Улаштыр волонтёрларны деткиири-биле чылдың-на шак мындыг балды эрттирер сорулганы организакчылар мурнунда салган.
Аңаа Тываның күрүне университединиң, российжи студентилер отрядтарының регионалдыг салбырының, Тываның экономика болгаш хоойлу-дүрүм, информастыг технологиялар, тудуг болгаш политехниктиг техникумнарның, Кызылдың медицина, уран чүүл болгаш башкы колледжтериниң, Олимпийжи курлавырлар училищезиниң, студентилерниң болгаш аныяктарның бүгү российжи “Баштайгыларның шимчээшкининиң” регионалдыг салбырының төлээлери киришкен.
“Бөгүн бистиң регионувуста амыдыралды экижидип турар эң-не тергиин хөй-ниити организацияларының болгаш аныяктарның байырлалы болуп турар. Тывада ниитизи-биле 96 эки турачы аныяктар организациялары бар. Бистиң аныяктарывыс дуза кадарынга кезээде белен. Кандыг-даа дуза дилээн кыйгырыг оларга бодун көргүзеринге, ниитилелге дузалажырынга, регионунуң мурнунга хүлээлгезин күүседиринге идиг болур. Олар бо бүгүнү сеткилинден кылып турарлар. Волонтёрлап келгеш, боттары дег дөмей сагыш-сеткилдиг эш-өөрнү тып алырлар. Тываның волонтёрларынга четтиргенивис илередир дээш, мындыг байырлалды эрттирип турарывыс бо. Мында келген кижи бүрүзү келир үеге үлегер-чижек болур. Ынчангаш волонтерларның ажыл-ижинге чедиишкинни күзеп, четтиргеним илереттим” – деп, Аныяктар херектериниң талазы-биле агентилелдиң директору Буян Сонам чугаалаан.
Оларның аразында Олимпийжи курлавырлар училищезиниң 4-кү курузунуң сургуулу Артыш Монгуш Волонтерлар хүнүн таварыштыр буянныг болгаш ак сеткилдиг дузазы дээш РФ-тиң Федералдыг хуралының федерациялар чөвүлелиниң Хүндүлел бижии-биле шаңнаткан.
“Училищеге өөренип келгеш-ле, 1 дугаар курстан тура волонтер апардым. Анаа-даа, кадыы кызыгаарлыг-даа улуска дуза кадарынга ынак мен.
Волонтер чуртталга меңээ кончуг солун болгаш таарышкан. Кижилерге дузалажып, буян чедирери дег өөрүшкү кайдал” – деп, Артыш Монгуш чугаалаан. Ол волонтер болурундан аңгыда, хостуг хүрешке Бүгү-российжи маргылдааларга Тываның адын төлээлеп чоруур спортчу.
Байырлалга кожууннардан волонтерлар база келген. Таңды кожууннуң төлээлери аныяктар шимчээшкини бо чылын кончуг сайзырап эгелээнин демдеглээн: “Бо чылын “Баштайгыларның шимчээшкини” тыптып келген соонда, аныяктар кончуг демниг апарган. Ниитизи-биле кожуунда 6 пункт ажыттынган. Ол ышкаш школада болгаш аныяктар чөвүлели база ажылдап турар. Айдан айже волонтерлар саны немежип кел-ле чыдар”.
Бо байырлал волонтерларның буянныг ажыл-ижин үнелеп, оларның хей-аъдын бедидер арга болуп турар. Оларны хүндүлел бижиктер, статуеткалар болгаш өртектиг белектер-биле шаңнап-мактаан.
Чыжыргана СААЯ.
Самба НОРБУЖУКТУҢ тырттырган чуруктары.
“Шын” №95 2023 чылдың декабрь 13