Малчын Тываның хүндүткелдиг байырлалы Наадымның программазында эң солун чүүл – республиканың эң күштүг мөгелериниң хүреш маргылдаазы.
2026 чылда Наадым хүрежинге 18-45 харлыг эң шыырак 267 мөге киришкен. Оларның чидиг сегиржип алыышкыннарын сонуургап келген кижилер “Хүреш” стадионну шыгырт долдур ээлепкен. Хүреш маргылдаазының эгези солун болган. Эң ылаңгыя ат-алдарлыг мөгелерни алгап-йөрээнин чон дыка сонуургаан. Алгыш-йөрээл хүреш маргылдаазынга тыва национал хөөннү киирген.
7–8 шак дургузунда үргүлчүлээн чараш болгаш чидиг салыгларның түңнелинде Сүт-Хөл кожууннуң аныяк мөгези Сүлде Доңгак шүглүп үнген, ол-ла Сүт-Хөлдүң оглу аныяк мөге Ширижик Түметей үжүүрлешкен.
Наадым-2026-га тураскааткан республиканың эң шыырак мөгелериниң хүрежинге шүүлген Арзылаң мөге деп атты чедип алган Сүлде Доңгакка, үжүүрлешкен мөге Ширижик Түметейге болгаш шаңналдыг черлерни ээлээн Начын, Хартыга мөге аттарга төлептиг болган аныяк мөгелерге Владислав Ховалыг байыр чедирип, моон соңгаар-даа хүрештерге тиилелгелерни күзээн.
Мөгелерни кижизидип өстүрген ада-иелерге, хүрешке өөреткен тренерлерге республиканың удуртукчузу байыр чедирип, өөрүп четтиргенин илереткен.
Наадым хүрежинге шүүлген, үжүүрлешкен, үжүүр хунаашкан мөгелерге шаңнал тыпсыры солун эвес болган деп болур. Наадымга шүүлген мөгелерни шаңнап-мактаарын чаңчыл болган ёзулал кылдыр эрттирип, мөгелерни алгап-мактаарының тыва улустуң шаандагы ёзулалын эгидери чугула деп эң ылаңгыя улуг назы-харлыг көрүкчүлер, оларның аразында хоочун мөгелер чугаалап турдулар.
Буян Ооржактың
тырттырган чуруктары.
“Шын” №29 2026 чылдың июль 30
"Шын" солуннуң МАХ-каналынга каттыжыңар: max.ru/channel_shyn