Парлалга хүнүнүң бүдүүзүнде «Шын» солуннуң хоочуну Тамара Ховалыговна Калчан 85 харлаан юбилейин демдеглээн. Тамара Ховалыговна республиканың парлалга адырынга, ылаңгыя «Шын» солунга, 30 чылдар дургузунда үлүг-хуузун киирген улуг дуржулгалыг, ажылынга мергежээн хоочунувус.
Ол Улуг-Хем кожууннуң Ийи-Тал сумузунга 1941 чылдың январь 12-де төрүттүнген. Шагаан-Арыгның 2 дугаар ортумак школазын чедиишкинниг дооскаш, баштай Кызылдың башкы училищезинге, оон педагогика институдунга башкы эртемин чедип алган. Башкылаашкын ажылын Эрзин кожууннуң Кызыл-Сылдыс школазындан эгелээн. Улаштыр Тес-Хемниң Самагалдай, оон Ү-Шынаа школаларынга ажылдаан.
1974 чылда ажыл-амыдыралының аайы-биле Кызыл хоорайга көжүп келгеш, парлалга адырынга баштайгы базымын «Шын» солун редакциязынга эгелээн. Корректор ажыл дыка нарын, ону тыва дылды эки билир, эң-не кичээнгейлиг, харыысалгалыг кижилер шыдаар. Тамара Ховалыговна шак-ла ындыг харыысалгалыг, ажылынга бердинген ажылдакчы. Ынчангаш бүгү назынында бодунуң мергежилинге ёзулуг шынчы, бердинген база дуржулгалыг солунчу. 90 чылдар төнчүледир «Эне сөзү» солунга, оон Республика типографиязынга корректорлап ажылдааш, хүндүлүг дыштанылгаже үнген.
Тамара Ховалыговнаның өөнүң ээзи Тываның билдингир журналистериниң бирээзи, «Парлалганыӊ тергиини» хөрек демдээниӊ эдилекчизи, «Шын» солуннуң хоочуну Маадыр-оол Калчанович Калчан. Калчаннар 2 оол, 2 кызын эртем-билиглиг кижилер кылдыр кижизидип өстүрген.
Тамара Ховалыговна солунчунуң чымыштыг ажылындан аңгыда, ногаа-чимис өстүреринге ынак. Калчаннарның өг-бүлези хүндүлүг дыштанылгаже үнгеш, дачазынга ногаа-чимис тарып, хаван-дагаа, харын-даа кастар безин тудуп турганнар.
Күш-ажылдың хоочуну Тамара Ховалыговна амгы үеде ажы-төлүнүң, уйнуктарының аразында хүндүткелдиг өгбези болуп чурттап чоруур. Ол шынчылар-биле харылзаазын ам-даа үспээн: «Күрүнениң ачызында бо хүнде эки чурттап чор мен. «Шын» солунга катай ажылдап чораан коллегаларым, өөрүм-биле бо хүнге чедир эп-найыралдыг, харылзаавыс үспейн эдержип чоруурунга өөрүүр-дүр мен»— деп, Тамара Ховалыговна чугаалаар.
Хүндүлүг хоочунувуска юбилейи болгаш Россияның парлалга хүнүн таварыштыр чылыг-чымчак байырывыс чедирбишаан, эң-не чаагай күзээшкиннерни сөңнеп, аас-кежикти, чыргалдыг узун назынны, бедик хей-аътты, быжыг кадыкшылды, өөрүшкү-маңнайны йөрээп тур бис!
«Шын» солун редакцияның коллективи.
Чуруктарны «Шын» солуннуң архивинден болгаш интернеттен алган.
“Шын” №1 2026 чылдың январь 15