Эң-не хереглээр чүүлү –техниктиг херекселдер

Тускай шериг операциязы эгелээнинден бээр Тываның чону Донбасстың чурттакчыларынга, Тывадан барып, украин националистер-биле тулчуушкунну чорудуп турар шериглеривиске материалдыг болгаш моральдыг дуза кадарынга идепкейлиг киржип келгеннер.

Тываныӊ чурттакчылары тускай шериг операциязында киржип турар дайынчыларга Шагаа уткуштур чедирип бээр белектерни чыып турганын шупту билир бис. Белек-селек чыырынга эптиг байдалдарны тургузар дээш, Каттышкан штабты организастаан турган.

Тыва чоннуӊ Шагаа байырлалын уткуур ёзу-чаӊчылын сагып, дайынчыларга гуманитарлыг дузаны Каттышкан штабтыӊ кежигүнү, Тыва Республикада Улусчу фронтунуң удуртукчузу Саима Далчин баштаан делегация тускай шериг операциязы болуп турар черге чедиргеш келген.

Ук делегация-биле парлалга конференциязы болуп эрткен. Саима Далчин ажыл-агыйжы сургакчылаашкынының дугайында илеткелди кылган:

– Чонувустуң чыып бергени гуманитарлыг дузаны тускай шериг операциязында киржип турар чаңгыс чер чурттугларывыска чедирер даалганы хүлээнген бис. Тывадан үнүпкеш, барык ийи неделя эрткенде ээп чанып келдивис. Канчаар чораанывысты, чүнү көргенивисти чонувуска чугаалаксаар-дыр бис. Александр Буланкин, Мерген Санчай-оол болгаш мен, үжелээн февраль 12-де Кызыл хоорайдан үнүпкеш, орук дургаар Кемерово, Омск, Новосибирск, Курган, Челябинск, Уфа, Самара, Саратов хоорайларны таварааш, тус черлерде Улусчу фронтунуң кежигүннери-биле ужуражып, оларның Шагаа болгаш Февраль 23 таварыштыр тыва шериглерге чорудар дээш белеткээн белек-селээн чыып алыр даалгавыс ол турган. Гуманитарлыг дуза чедирип чоруур деп турарывысты дыңнааш, белек-селек чорудар дугайында күзелин боттары илереткен улус чүве. Чижээлээрге, Кемерово хоорайда коллегаларывыс лааларны, Омск хоорайның төлээлери чигирзиг аъш-чемни болгаш генераторну, уфажылар башкир медту дээш регион бүрүзү бодунуң бүдүрүлгезинден белек-селекти тыва шериглерге байырлал таварыштыр берген. Бо бүгү чүнү чугаалап турарыл дээрге, Россияның чоннары чаңгыс аай эп-сеткилдиг болуп, демнежип эгелээниниң херечизи-дир.

Александр Буланкинниң чугаалааны-биле алырга, ДУР-да тыва офицерлеривистиң чагыын езугаар, ТР-ниң Садыг-саарылга палатазының болгаш «Деловая Россия», «Опора России» бизнес-каттыжыышкыннарының чыгган акша-төгерии-биле Балаково хоорайдан «НИВА 2131» маркалыг автомашинаны садып чедирген.
Тывадан чораан делегация чүгле ДУР-га чедер планныг турган-даа болза, ЛУР-га чедер арга тургустунуп келирге, аңаа база чедип, ында чаңгыс чер чурттугларынга база ужуражып, оларның хей-аъдын көдүрер аргалыг болган. Гуманитарлыг дузаны дүжүрүп турган үеде аткылажыышкын болганын, аас-кежик болуп, озал-ондак болбаанын Саима Далчин чугаалады.

Дараазында гуманитарлыг дузаны тускай шериг операциязында киржип турар шериглерниң чагыын езугаар күүседир. Шериглерниң аъш-чем болгаш идик-хеп хандырылгазы чогуур байдалда. Эң-не хереглээр чүүлү – квадрокоптерлер, тураннар, фонарьлар дээн ышкаш техниктиг херекселдер дээрзин Саима Далчин демдегледи.

Тускай шериг операциязында киржип турар чаңгыс чер чурттугларынга материалдыг дуза кадыксаар чонувустуң кичээнгейинге:
Кызыл хоорайның Кочетов кудумчузунуң 155 дугаарлыг бажыңы (тел. 2-17-44) азы ол-ла кудумчунуң 30 дугаарлыг бажыңында 26 дугаар кабинет (тел. 2-10-50). Оон аңгыда, «Улусчу фронт. Бүгү чүүлдү тиилелгеже!» QR-код-биле база акша-төгерикти шилчидип болур.

/ Бистиң корр.