Май 9-12 хүннеринде Новосибирск хоорайга Делегей чергелиг “Сибирские ассамблеи искусств” IV фестиваль-мөөрей болуп эрткен. Аңаа “Эдегей” танцы театрының бичии бөлүү киришкеш, фестивальдың II чергениң лауреаттары бедик шаңналды чаалап алган. Тываның адын бедик тудуп, төлептиг киришкен бичии "эдегейжилер" бөгүн, май 13-те, чанып келгеннер.
РФ-тиң Культура яамызының деткимчези-биле болуп турар фестивальга хореография, театр уран чүүлү, эстрада, хор болгаш чаңгыстың күүселдезинде ыры мөөрейлери дээш номинация бүрүзүн аңгы-аңгы хевирлерге база назы-хар аайы-биле бөлүктеп чарган.
Бо удаада “Эдегей” танцы театрының бичии бөлүү 7-8 харлыглар аразынга “Кыстың чажыды” биле “Кадарчы кыс база хураганнар” деп ийи танцыны бараалгаткан. Олар жюриниң болгаш аңгы-аңгы регионнардан келген хөй санныг киржикчилерниң, көрүкчүлерниң сонуургалын чаалап алганнар.
Ол дугайында “Эдегей” танцы театрының удуртукчузу Кима Донгак чугаалады:
— Бистиң бичии “эдегейжилеривис” Новосибирск хоорайга болган фестивальга кончуг эки киришкеш, бөгүн өөрүшкү-маңнайлыг чанып келдивис. Аэропортка ада-иелери бисти дыка онза уткуп алдылар. Шупту уругларының чедиишкининге өөрүп, чоргаарланып турар чордулар.
Фестиваль үезинде боттарының бөлүүнге “Эдегей” кончуг шыырак 37 ансамбль аразындан шылгарап үнгеш, II дугаар чергениң лауреаттары атты чаалап алдылар! Ол дээрге дыка улуг чедиишкин-дир. Бо уруглар дээрге чаа-ла 1-ги классчылар болгай. Ооң кадында, бо бөлүктүң бир дугаар Тывадан дашкаар үнүүшкүнү-дүр. Ол хиреде эр хейлер болдулар!
Жюри кежигүннери бистиң уругларывыстың танцылаарын мактап турду. Ылаңгыя холдарының ээлгирин демдегледи, костюмнарны, танцыларның аялгазын дыка чарашсынган. Ылаңгыя “Кыстың чажыды” деп танцыны бо хире бичии уругларга нарын деп демдеглээш, ону бо уругларның чаңгыс кижи дег танцылап шыдапканын магадап чугаалап турдулар.
Чүгле фестивальга киржиринден аңгыда, уруглар Новосибирск хоорайны сонуургап, экскурсиялап, зоопаркты база көрген. Фестивальдың организакчылары бисти дөрт сылдыстыг аалчылар бажыңынга чыттырып каан. Ында бүгү байдалдарга уруглар таарзынган. Мырыңай чаныксавайн тур бис дижип-даа турдулар.
Бо чылын “Эдегей” тургустунганындан бээр 25 чыл оюн демдеглеп турар. Бо чылдар дургузунда чеже салгал үнмээн дээр. Бо юбилейлиг чылда бөлүк бүрүзү бодунуң белээн — тиилелгелерин арттырып каар дээни, шынап-ла, чыл эгезинден тура улажып тур. Февраль айда бистиң улуг бөлүктүң уруглары хары угда 3 шаңналды чаалап экелдилер, май эгезинде ортумак бөлүк “Россияның национал өнчүзү” деп Москвага болган фестиваль-мөөрейге I дугаар чергениң лауреаттары болдулар. Ам бичии бөлүүвүс база бедик шаңналды чаалап алдылар. Аңаа канчап чоргаарланмас боор! Ада-иелерниң кызымаа, уруг-дарыының салым-чаяанын деткип, оларның хостуг үезин чөп ажыглап билирин маңаа демдеглээри чугула. Оларга четтирдивис!
Бистиң корр.
Чуруктарны “эдегейжилерниң” ада-иелеринден алган.