Тускай шериг операциязында киржип турар эрес-дидим маадырларга деткимче кѳргүзери уламчылавышаан. Бүгү-российжи Улусчу фронтунуң Тывада күүсекчи комитеди ТР-ниң Чазааның деткимчези-биле чаңчыл болган «Автопоезд» акциязын бо удаада база эрттирип турар.
Сентябрь 19-та «Автопоезд» акциязының шугуму-биле 10 автомашинаны Тывадан үдээн. Улусчу фронтунуң Тывада күүсекчи комитединиң даргазы Саима Далчинниң дыңнадыы-биле, ТР-ниң Чазаа 3 автомашинаны (Истана, УАЗ Патриот, Волга), Ространсхайгаарал ГАЗель биле ВАЗ-2107 чиик автомашинаны, Тываның кадет корпузу УАЗ-ты база бир УАЗ маркалыг автомашинаны Ак-Эрик суурдан дайынчы Сумуяа Сергеевич Сандаага Аян-оол Ланаа бодунуң ѳмүнээзинден, бии-хемчилерден «Нива» болгаш Абакандан бир хуу машинаны дамчыдып турар. Хавыртынган ѳнчү-хѳреңгиден «Субару Форестер» деп машинаны Улусчу фронтунуң тѳлээзи, хууда сайгарлыкчы Мерген Санчай-оол бодунуң күсели-биле кылдырып, чаарткаш, дамчыдып турар. Шупту машиналар техниктиг хыналданы эрткен. Кезектерин солуур, чаартыр ажылдарны болгаш Кызылдан Абаканга чедир кывар-чаар материал-биле хандырылганы ТР-ниң Чазааның автобазазы болгаш «Содействие» регионалдыг фонд кылган.
Экер-эрес дайынчыларга чедирер машиналарны Улусчу фронтунуң кады ажылдап турары «Россияның демир-оруктары (РЖД)» компаниязы Абакандан Донда Ростов хоорайга чедир поезд-биле чедирер.
Надежда КУУЛАР.
Ада ТЮЛЮШТУҢ тырттырган чуруктары.
«Шын» №72 2024 чылдың сентябрь 21