Бөгүн, ноябрь 21-де, суд системазының хоочуннарындан тургустунган «Деткимче» волонтержу бөлүк база Тыва Республика талазы-биле Росреестр эргелели тускай шериг операциязынче гуманитарлыг деткимчени Улусчу фронтунуң Тывада салбырының төлээлеринге дамчыткан.
Улусчу фронтунуң «Бүгү чүүлдү тиилелгеже» деп акциязы Тыва Республиканың Чазааның деткимчези-биле республика девискээринде ажылын уламчылап турар. Регионнуң сагыш-човангыр чону болгаш ажылчын коллективтери тускай шериг операциязында киржип турар шериг албанныгларны деткиири-биле кышкы гуманитарлыг ачы-дузаларны чыып турар дээрзин сагындыраал.
«Чаңгыс чер чурттугларывысты тускай шериг операциязы эгелээнден бээр деткип келдивис. Бөгүн ниитизи-биле 60 дугаар камгаланыр четкини доостувус. Четкилер өрүүрүнден аңгыда, акша-төгериивсити чыггаш, херек чүүлдерни саткаш удаа-дараа чорудуп турар бис. Бо удаада ийи чылыг бээр пушканы, ийи бензин генераторун болгаш үш четкини эккеп хүлээттивис. Дайынчыларывыс тиилелгелиг чанып келиринге чедир деткиир бис» – деп, суд системазының хоочуну, «Деткимче» волонтержу бөлүктүң кежигүнү Зинаида Моңгуш чугаалады.
«УАЗ Патриот» автомашинаны Тыва Республика талазы-биле Росреестр эргелели хүлээткен. Бо организация дөрт дугаар автомашинаны тускай шериг операциязынче чорудуп турары бо. Олар оон аңгыда, дайынчыларның дилээн езугаар дыка хөй дериг-херекселди чоруткан.
Машина ажыглалга белен, кышкы дугуйларны салгаш, чедер-четпестерин чаарттып, септелгени баш удур кылган дээрзин Тыва Республика талазы-биле Росреестр эргелелиниң даргазының хүлээлгезин күүседип турар Елена Белявская дыңнатты.
Тускай шериг операциязынче чорудар кышкы чүъктү декабрь 16-да ДУР-же болгаш Курск облазынче аъткарар дээрзин сагындыраал.
Айдың ОНДАР.
Инга ОНДАРНЫҢ тырттырган чуруктары.