Август 12-де Улусчу фронтунуң бүдүн чай дургузунда чыгган улуг чүъгүн аъткарып чоргускан. Аңаа Суд приставтарының регионалдыг албаны тускай техниканы болгаш дериг-херекселди адрестиг кылдыр хүлээткен.
Мотоцикл, генераторлар болгаш дронну ораап хаптааш, бистиң шериг албанныгларывыстың бирээзинче чоргузар сорулгалыг дуза демдеглеттинген. Шеригжи боду Улусчу фронтунуң регионда салбыры-биле харылзажып, дузаны дилээн турган. Суд приставтарының удуртулгазы дораан харыылап, даңзыда бар бүгү херек чүүлдерни саткан.
«Ажылдакчы бүрүзү ниити ачы-дуза чедирилгезинге күзелдии-биле үлүг-хуузун киирген. Чыгдынган акша-хөреңги-биле дайынчыларның чагыы ёзугаар мотоциклди, машина-техника септээр дериг-херекселдерни болгаш кывар-чаар материалдарны саттывыс. Амгы үениң дроннарын тывар “Булат-4” деп тускай херекселди онзалап демдеглээр-дир бис. Ол 15 шак чедир ажылдаптар күштүг” – деп, Федералдыг суд приставтарының регионалдыг удуртулгазының кол специалист-эксперди Камила Монгуш чугаалаан.
Улусчу фронтунуң чайгы үеде чыгган өске-даа чүүлдери болгаш дериг-херекселдери-биле чүък дола берген. Ачы-дуза чыылдазы май айда-ла эгелээн турган. Бо үениң дургузунда янзы-бүрү албан черлери болгаш волонтёрлар буянныг ажыл-херекке киришкен.
«Гуманитарлыг дузаны август 12-де чорудупкан бис. Мотоциклдерни, дроннарны болгаш тайбың чурттакчы чонга амыдарылга ажыктыг чүүлдерни база чыгдывыс. Ниитизи-биле 10 тонн чыгдынган. Бо дуза бистиң дайынчыларывыска болгаш Донецк Улус Республиканың тайбың чурттакчыларынга чедер” – деп, Тывада Улусчу фронтунуң координатору Даяна Тажи чугаалаан.
Гуманитарлыг дузаны 5 тонна чүък чүдүрер ийи машинага чоруткан. Чүъктү 5 хире хонук дургузунда Донецкиге чедирери көрдүнген. Улаштыр аңаа шериг кезектериниң командирлеринге үлээр.
Чыжыргана СААЯ белеткээн.
Чурукту интернет четкизинден хоолгалаан.
“Шын” №31 2025 чылдың август 14