Март 3-те Тываның Чазак бажыңынга ТР-ниң Чазак Даргазының оралакчызы Орлан Сарыгларның удуртулгазы-биле ээлчеглиг хурал болуп эрткен. Аңаа тускай шериг операциязының киржикчилеринге болгаш оларның чоок кижилеринге «Бүгү чүүлдү Тиилелгеже!» деп республика комиссиязының деткимчезиниң дугайында чугаалашкан.
Хүннүң чугула айтырыгларының бирээзи — тускай шериг операциязынга киришкеш, бертик-межел арткан хоочуннарга деткимче база оларның адаптациязынга хамаарыштыр чоруттунуп турар хемчеглер. Ийиде, дайынчы хөделиишкиннер үезинде ис чок читкен солдаттарның өг-бүлелеринге деткимче. Үште, ТШО киржикчилеринге болгаш оларның чоок кижилеринге күрүне деткимчезиниң дугайында ТР-ниң Баштыңы Владислав Ховалыгның ТР-ниң Дээди Хуралынга (парламентизинге) Айыткалында киирген чүүлдерниң боттанылгазының дугайында чугаалашкан. Дөртте, РФ-тиң ОБЯ-ның Тыва Республикада эргелелиниң ТШО киржикчилеринге дуза кадар талазы-биле ажылдарының амгы үеде байдалының дугайында.
Баштайгы ийи темага хамаарыштыр Ада-чурт камгалакчылары фондунуң регионда салбырының удуртукчузу Мерген Кызыл-оол илеткээн. Ооң соонда ТР-ниң күш-ажыл болгаш социал политика сайыдының бир дугаар оралакчызы Сылдыс Ондар ТР-ниң Баштыңының Айыткалында ТШО киржикчилеринге деткимче дугайында чүүлүнүң боттанылгазының дугайында илеткелди кылган.
Хурал чүгле офлайн хевирге эвес, а ырак-чоок кожууннарның чагырга даргалары болгаш ук темага харыысалгалыг ажылдакчыларның база онлайн хевирге киржилгези-биле болуп эрткен дээрзин сагындыраал.
Айдың ОНДАР.
Чурукту интернет четкизинден хоолгалаан.
“Шын” №8 2026 чылдың март 5