«Шын» солуннуң эрткен үндүрүлгезинде база-ла черлик ыттар темазын чырыткан болду. Ында бижип турары болза, неделя дургузунда 10 кижи ытка ызырткан болуп турар. Ынчангаш бир ай дургузунда онза байдалды чарлаан. Кудумчуларда халып турар ыттарны туткаш, 14 хонук дургузунда приютка азыраар, ол үе дургузунда ээлери тып келбес болза, чок кылыр деп бижээн. Кончуг шын шиитпир үндүрген-дир, аңаа каттыжар кижи-дир мен. Ылап-ла ээзи чок ыттар-ла кудумчуда тояап, кижилер ызырып тур-ла ыйнаан. Ээлиг ыт бажыңынга баглаашка-ла тургай.
Тояанчы ыттарны тудуп, приютка азырап, тарылга чорудуп дээш-ле улуг-ла чарыгдалдар үндүрүп турар. Ооң орнунга дириг амытаннар эмнээр эмнелгелерден ажытса. Кызыл хоорайда каш ындыг эмнелгелер бар, олар шупту хуу кижилерниң. Ыт-куш эмнедирге, тарылга кылдырарга, өртек-үнези дыка аар, кижи күш четпес. Ынчангаш-ла чамдык улус төрүпкен кыс ыдының эниктерин кудумчуже октаптар, ооң түңнелинде ээзи чок, черлик ыттарның тыптып, көвүдеп-даа турар чылдагааны ол. Көдээ суурларда байдал база-ла ындыг. Ам мырыңай бөлүк ыттар мал-маган, чаш бызаалар тудуп чип турар апарган-дыр.
Бөрүлерниң санын эвээжедир дээш, даргалар Чазакка хуралдап турдулар. Черлик ыттарга база ындыг ажылдан чорутса кандыг чүвел. Кижилерже халдап турар дээрге, олар бөрүлерден ылгал чок, арааттаннар апарган ышкажыл.
Алексей КАРА-ООЛ, ИХЯ-ның хоочуну.
Кызыл хоорай.
Чурукту интернет четкизинден алган.
«Шын» №4 2025 чылдың февраль 6