Сөөлгү каш чылдарда хөй ажы-төлдүг өг-бүлелерге күрүне болдунар-ла шаа-биле деткимчени көргүзүп турар. Федералдыг-даа, регионалдыг-даа деткимче төлевилелдер хөй. Оларга «Социал хөмүр-даш», «Улусчу картофель» дээн ышкаш губернатор төлевилелдерин хамаарыштырып болур.
ТР-ниң Күш-ажыл болгаш социал политика база Одаар чүүл болгаш энергетика яамылары Тываның Баштыңы В.Ховалыгның даалгазы-биле, «Социал хөмүр-даш» губернатор төлевилелин боттандырып турар.
2024–2025 чылдың кыжынында 18 хар четпээн 4-тен хөй ажы-төлдүг өг-бүлелерни одаар чүүл-биле хандырарынга 12 242 700 рубль акшаны регионнуң бюджединден тускайлап үндүрген. 2856 өг-бүле «Социал хөмүр-даш» программазының деткимчези-биле одаар чүүлдү ап эгелээн. Оларның аразындан 2791 өг-бүлеге хөмүр-дашты, 65 өг-бүлеге одаар ыяшты дүжүрери планда көрдүнген.
Октябрь 8-те Кызыл кожууннуң Ээрбек сумузунга «Тывамедиабөлүк» -биле четкеш, күрүне деткимчези ап турар хамаатылар-биле чугаалаштывыс. Ээрбек суму чагыргазының социал адыр талазы-биле специализи Шораана Шагаалаңның медеглээни-биле алырга, Ээрбек сумузундан бо чылын хөй ажы-төлдүг 32 өг-бүле күрүне деткимчези 2 тонна хөмүр-дашты ап турар. «Эрткен чылын 37 болза, а бо чылын 32 өг-бүле социал хөмүр-даш губернатор төлевилелиниң деткимчезин ап турар. Өреге бүрүзү 2 тонна азы 28 ванна хөмүрнү алыр» – деп, Шораана Шагаалаң чугаалады.
Чаа чыл үнүп келирге-ле, дараазында одалга сезонунда социал хөмүр-даш төлевилелиниң деткимчезин алыры-биле билдириишкинни тус черниң чагыргазында социал адырга киирер. Билдириишкин киирген хамааты бүрүзү ук деткимчени албас. Тускай комиссия хыналданы чоруткан соонда, социал хөмүр-даш алыр хамаатыларның даңзызынче кирер.
Күрүне деткимчези ап турар өг-бүлелерниң бирээзи Азияна Форума. Ол алды ажы-төлдүг. Беш дугаар чыл күрүне деткимчезин ап турарынга өөрүп четтиргенин илеретти. Азиянаның ажы-төлүнүң хеймери чаа-ла 3 хар ажып чоруур.
Дараазында Тимур Билчинейниң чурттап олурар оран-савазынга ийи тонна хөмүр-дашты дүжүрүп бээри-биле чеде берди. Аалдың эр ээзи үнүп келгеш, одаар чүүлдү өөрүшкү-биле уткуп хүлээп алды. «Үш дугаар чыл ийи тонна хөмүр-даш ап тур бис. Хөй ажы-төлдүг улуска күрүнениң талазындан улуг деткимче деп санаар мен. Улуу-биле четтирдивис!» – деп, Тимур чугаалады.
Ылаңгыя күскү соок хүнде одаар чүүл алган өг-бүлелерге өөрүнчүг болганы чугаажок.
Айдың ОНДАР.
Буян ООРЖАКТЫҢ тырттырган чуруктары.
“Шын” №77 от 2024 чылдың октябрь 9