Аңчы-Кара Хүрең-оол 1998 чылдың январь 15-те Кызыл хоорайга ада-иези Эдуард Александрович Хүрең-оол биле Салбакмаа Монгушовна Бады оларның дөрт ажы-төлүнүң эрге-чассыг хеймер оглу болуп төрүттүнген. Ээрбек сумузунуң Оюн Оолак аттыг ортумак школазынга 1-ги классче өөренип киргеш, 2013 чылда 9-ку классты эки өөредилгелиг, чедиишкинниг дооскан. Бичиизинден тура чаптанчыг, мөзү-шынары кижизиг оол болуп өскен. Ачазының чанынга ооң кылып чораан ажылынга дузалажып чорааш, тудуг тудуп, эр кижиниң кылыр ажылдарын шиңгээдип алган.
Сургуул чылдарының баштайгы базымнары Кызылдың экономика болгаш эрге-хоойлу техникумунуң банк салбырының специализи мергежилди 2016 чылда чедип алганындан эгелээн.
Аныяк кижиниң чуртталгазында албан эртер оруу, күстүң ортаакы айында шериг албанынче кыйгырты берген. Аңчы-Кара Эдуардович хып дээн аныяк үезин Курск облазының маршал Жуков девискээринге, агаар кызыгаарын камгалаар шериг кезээнге эрттирген.
Бергелерни белен-селен тоор хире эвес, мөге-шыырак эр Аңчы-Кара Красноярск крайда Железногорск хоорайда турар шериг кезээ-биле 2018 чылда керээ чарып алгаш, 2023 чылга чедир ында турар күрүнениң чажыт албан черлеринге шериг херээн эрттирген.
Железногорск хоорайга шериг кижи болуп ажылдап тургаш-ла, Аңчы-Кара Бурятияның көдээ ажыл-агый академиязынче 2020 чылда бот-өөредилге-биле өөренип киргеш, 2024 чылда “Экономист” деп эртемниң дипломун холга алган.
Аныяк кижиниң амыдыралга сонуургалдыын, амыдыралчызын, хилис үе эрттирбейн өөренип алганынга ада-иези аажок-ла өөрээннер.
Тускай шериг операциязы эгелей берген соонда, Россия Федерациязының удуртукчу даргалары чамдык чурт иштинде шериг кезектерин барыын талакы областарже шилчидип эгелээннер. Ол тускай өскерлиишкинниг ажыл Железногорск хоорайда турар Аңчы-Караның шериг кезээн база оюп эртпээн. Олар бо удаада Ростов облазының Казачьи лагери деп суурнуң девискээринде турар 6962 дугаарлыг росгвардейжилер кезээнге келгеннер.
Дайынчы өөредилгелер, белеткелдер соонда, дайын шөлүнче кирер үе келген. 2024 чылдың чайының адак айында Аңчы-Караны эш-өөрү дайынчылар-биле кады Харьков облазының Волчанск хоорайын хостажыры-биле үр хуусаалыг сургакчылаашкынче чорудупкан. Росгвардейжи дайынчы эштери-биле каш-даа янзы операцияларга киржип, берге-ле оруктарны эрткен. Ооң шериг кыйгы ады “Сагылдак”.
Эки быжыглаттынган Волчанск хоорайны российжи шериглер алды айның дургузунда хүнден хүнче дайылдажып тургаш, улуг хоорайның чүгле чартык кезиин хостап алганнар.
Бо чугула улуг хоорайның девискээринде украин шериглерниң десант-шүүргедекчи бригадазы база “Даштыкы легион” хөлезиленикчилери мөөңнеттинген. Ынчангаш украин радикалдар Волчанск хоорайны ыяап-ла дедир эгидип алыр сорулгалыг, российжи шериглерге бичии-даа амыр-дыш бербейн турганнар. Дайын шөлүнге дайынчы кезек бүрүзү күүседир база бажы-биле харыылаар ажылдары аңгы болур. Аңчы-Караның дайынчы хүлээлгезин күүседип турган Росгвардейжи шериг ке- зээ – дайзынның коргунчуг артбоолаашкыны соксай бээрге, балыгланган база хары черге бажын салган маадырларны айыыл чок черлерже үндүр сөөртүп, оларга баштайгы эмчи дузазын чедирери, санитарларга дамчыдып бээри болур.
Волчанск хоорайның чурттакчыларын чурт иштинче көжүрүп каапкан-даа болза, чер чедип албас, улуг назылыг хамаатылар арткан боор. Олар чеже-даа украин омак-сөөктүг болза, оларга база росгвардейжилер гуманитарлыг дузаны көргүзүп турганнар. Эрес-дидим маадыр камгалакчывыс менди-чаагай чанып-ла кээр болзун.
/ Тамба ХҮРЕҢ-ООЛ.
Июнь 2026 чыл. Туран хоорай.
Чурукту авторнуң архивинден алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn