Кызыл хоорайның кырганнар болгаш хоочуннар интернадында кандыг кижилер чок дээр: назы-хары улгадып, чѳнүп кыраан, кадыы кошкак, харык-шинээ кызыгаарлыг… Оларга социал ажылдакчыларның дузазы эргежок чугула. Бистиң социал ажылдакчыларывыс дыка эки ажылдап турарлар.
Интернаттың директору Серен Күжүгет коллективти билдилиг удуртуп турар. Ол үргүлчү арыг-силиг байдалды болгаш аъш-чемниң шынарын хынап турар. Аъш-чеми дыка эки, эътти үргүлчү чип турар бис, ногаа болгаш чимис аймаан хүннүң-не рационче киирип турар. Чем хѳй янзы, белеткеп турары амданныг.
Культура-массалыг хемчеглерни, оюн-тоглааны үргүлчү бедик шынарлыг эрттирип турар, концерттер база удаа-дараа кээп, хоочуннарның дыштанылгазын каастап турар.
Эвилең-ээлдек директорувуска, интернадывыстың коллективинге бистиң дилеглеривисти хандырып берип чорууру-биле бо хүнде эки чурттап орарывыс дээш, сеткиливистен ѳѳрүп четтиргенивисти илередип тур бис.
Н.Ч. САТ, интернаттың хоочуну.
“Шын” №76 2024 чылдың октябрь 2