Чыл кандыг эрткенил?
РФ-тиң алдарлыг артизи, Тываның улустуң артизи, В.Көк-оол аттыг Национал хөгжүм-шии театрының хоочун артизи Анна Шириин-оол:
— Ниитизи-биле амы-хууда амыдыралымда бо чыл ажы-төлүмге-даа, ал-бодумга-даа эки чыл болду. Чогаадыкчы ажыл-ижимге хамаарыштыр чугаалаар болза, бистиң алдарлыг режиссёрувус чораан Алексей Ооржактың “Күлтегин”, “Кым сен, Сүбедей?” деп шиилерин катап тургускаш, театрның репертуарынче кииргенинге өөрүп турар мен. Ол ышкаш театрывыста чаа шиилер немежип турар. Бодум “Көшке” деп шиини онзагайлап демдеглекседим. Бир тускай шии болган. Ону бистиң алдарлыг артизивис, режиссер Орлан Монгуш тургускан. Ол ышкаш бо режиссёр юбилейлиг концертинден кирген орулгазын (100 муң рубльди) амы-хуузунда ТШО-да оолдарга дузаламчы кылдыр бергенин театрның артистери үнелеп, өөрүп хүлээп көрдүвүс. Бо болза биске, культура ажылдакчыларынга, болуушкун болду. Ынчангаш чаа үнүп келир чылда театрывыска моон-даа улуг чедиишкиннерни, бүгү тыва чонувуска амыр-тайбың амыдыралды күзевишаан, республикавыс моон-даа соңгаар хөгжүүр болзун деп йөрээдим!
Сорунза МОНГУШ.
«Шын» №100 2023 чылдың декабрь 30