Эрзин кожууннуң Мөрен суурга чоокта чаа Чазактан бөлүк даргалар келгеш, чон-биле хурал эрттирген. Мөрен суурнуң ажылчы чону, школа, уруглар сады, эмнелге коллективтери аңаа идепкейлиг киришкен. Чазактың эрткен чылгы кылып чоруткан ажыл-ижин илеткээн соонда, удаа-дараа саналдар база эгелээн. Баштай-ла сумунуң идепкейжи хоочуннары боттарының бодалдары-биле үлешкен.
Мен бодум хуумда сөс алгаш, Владислав Ховалыг даргавыска дыка хөй эки чүүлдерни кылдыртканы дээш өөрүп, ол дээш «5» деп демдекти салырын саналдадым. Часкы тарылга үезинде буга бажы суг бадырарынга бергедежип турарывысты чугааладым. Ол айтырыгларны Эрзинниң чагырга даргазы-биле сайгарып, чугаалажыр болду.
Мөрен школазының башкызы Светлана Борагайевна Дамдын суур музейиниң оран-сава чогундан, дыка эки экспонаттар дериттинмейн турарын чугаалаан. Көдээ ажыл-агый дугайында Урана Ооржак саналдаан. Хой дүгүн черге октавайн, дужаар болза эки деп, ол демдеглээн. Кызылда хой дүгү дужаар, болбаазырадыр чер удавас ажыттынар деп билдивис.
Санал-онал киирген улус Чазактың кылып чоруткан ажылдарын «эки» деп үнелээн.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.
«Шын» №35 2024 чылдың май 15