Тываның эки турачы өрт өжүрүкчүлери бо чылдың эгезинден тура 134 өрттү өжүреринге дузалашкан.
Албан-хүлээлгезиниң аайы-биле өрт айыылынга удур демиселди чорудар тускай албан черлеринден аңгыда, эки туразы-биле өрт халап өжүреринге киржип болур хөй-ниити организациялары, каттыжыышкыннары база бистиң чуртувуста өрт-биле демисел ажылында үлүг-хуузун киирип турар. Оларның ук хөй-ниитиге, дириг бойдуска ачы-дузалыг, буянныг ажыл-херээ хоойлу езугаар чурумчуттунган, тускай өөредилгени эртип турар, тускай негелделерлиг болур дээрзи тодаргай. Ук ажыл-чорудулганы Онза байдалдар яамызының хайгааралының адаа-биле боттандырып турар.
Бо хүннерде Тывада төрээн чери дээш өрт халавы-биле удур туржурунга белен эрес-дидим 1150 ажыг кижилер бар, олар эки турачы өрт өжүрүкчүлери болуп турар. Чүгле бо 2022 чылдың эгезинден тура 5 ай дургузунда олар техника-биле хандырттынган база техника чок эки турачы өрт өжүрер командалар болуп алгаш, 134 өрт өжүреринге киришкеннер. Ол дээрге Тываның чуртталга черлериниң девискээринге болган бүгү өрттерниң 13 хуузу болур.
Улуг-Хем, Бай-Тайга болгаш Кызыл кожууннарның эки турачы өрт өжүрер командалары эрткен 5 ай дургузунда эң-не эки үре-түңнелдерлиг болган. А эрткен 2021 чылда 13 эки турачы өрт өжүрүкчүлерин Россияның Онза байдалдар яамызының шаңналдары-биле демдеглээн.
РФ-тиң ОБЯ-ның ТР-де Кол эргелелиниң парлалга албанының медээлери-биле белеткээн.