Эрик Доңгак – Өвүрнүң база бир салым-чаяанныг шүлүкчүзү. Ооң «Катап февраль» деп ному тыва поэзияның мөгейикчилеринге улуг белек болган. «ВКонтакте» социал четкиде «Эрик Доңгак Шүлүктер» деп бөлүүн барык тос муң кижи доктаамал номчуп турар. Амгы үениң аныяк сураглыг чогаалчызының чоокта чаа бижээн шүлүктерин бараалгаттывыс.
Эртип олур, шайлап көрем.
Энир ояар
Эргин артап кирбестээн сен.
Мен-даа база
Мегелээш-даа канчаар деп мен.
Чайым-на чок,
Чаңгыс сени уткан болдум.
Кезек-кезек
Кежээлерде сактып келгеш,
Карандажым
Халзырымга, сөстер үнмес.
Музам чокта,
Мулдурлап-даа чадап каан мен.
Экии, Музам!
Эртип олур, кады шайлаал.
Саазынга
Сагыжымны сарыктыраал.
***
«Саргыякты чааскаан чивес,
Туманныгда аза бээр» дээн
Чашкы шаамда котпактаныг
Дуңзаалаан дег уттундурбас.
Шуптузунга үлей кезип,
Сунуп чораан хиремде-ле,
Дуурайлыг чуртталганың
Туманында азып чор мен.
Сыын чады үезиниң
Сырын-аагы ажыг-ла-дыр.
***
Интернеттиң көзенээнче үзүк чокка
Идегелдиг көрүш-биле кайгап ора,
Августуң кударанчыг узун даңы
Адып кээнин күжүр бодум
билбээн болдум.
Чуруктарың дидим эвес ажып ора,
Чуртталгаңның шуудаанынга
өөрээн ийик мен.
Карактарың чайнап хыпкан көрүжүнде
Кады чораан үелерим изи-даа чок.
Энир бир-ле "кандыг чор сен,
эки бе?" дээн
Эсэмэзиң харыызын-даа чорутпаан мен.
Мээң үем эртип калган ол-ла-дыр ийин.
Мен дээш кортпа, дүвүреве,
ажырбас мен.
Чурукту интернет четкизинден алган.
“Шын” №44 2025 чылдың ноябрь 13