Экии, школа!

Сентябрь 1 – онзагай байырлал. Школаның эргинин бир-ле дугаар артап кирер чаштарга үрде манааны болуушкун, а доозукчуларга эң-не сөөлгү бирги коңга.

Тываның 175 школаларынга Билиглер хүнүнге тураскааткан бирги болгаш доозукчу класстарның өөреникчилеринге байырлыг чыскаалдар болуп эрткен. Чаа өөредилге чылында республиканың школаларында 7810 чаштар бирги классче, 5649 элээдилер тоску классче, 2083 доозукчулар он бирги классче өөренип кирген.
Совет Эвилелиниң Маадыры Ч.Н. Хомушку аттыг Кызыл хоорайның 16 дугаар лицей-школазынче бо чаа өөредилге чылында 252 бирги классчылар өөренип кирген. Школаның директору Альберт Дапылдай байырлыг чыскаалды ажыткаш, башкыларга, өөреникчилерге, ада-иелерге болгаш өске-даа келген аалчыларга Билиглер хүнү-биле байыр чедирген. 16 дугаар лицей-школа таптыг-ла беш чыл бурунгаар Спутник микрорайонунуң чаш ажы-төлүнге эжиин ажыдып, чымыштыг ажылын эгелээн дээрзин школаның директору демдеглээн.

Байырлыг чыскаалга күрүне тугун ук школаның 11 «а» клазының өөреникчилери Санчай Сүге-Маадыр биле Виктория Элбек көдүрген. Санчай тыва хүрешке аңгы-аңгы маргылдааларга шаңналдыг черлерни ээлеп чоруур мөге, а Виктория орус дыл биле ниитилел эртемнеринге олимпиадаларның регионалдыг чадазынга тиилекчи. Олар кайызы-даа төрээн школазының чоргааралы.

Кызыл хоорайның чагырга даргазының экономика талазы-биле оралакчызы Вячеслав Мажаа, Тываның Спортчу хүреш федерациязының даргазы, Кызыл хоорайның Төлээлекчилер хуралының депутады Буян Бурбучук, школаның ада-иелер комитединиң даргазы Людмила Монгуш олар байырлалдың хүндүлүг аалчылары болуп, тус-тузунда чылыг-чымчак сөстерни чугаалаан.

Буян Бурбучук, Кызыл хоорайның Төлээлекчилер хуралының депутады:

– Билиглер хүнү болгаш чаа өөредилге чылын уткуштур Кызыл хоорайның депутаттарының өмүнээзинден чыылган чонга байыр чедирип тур мен. Эргим ажы-төл, чаа-чаа билиглерни улуг сонуургал болгаш өөрүшкү-биле өөренип, бот-боттарыңарга дузалажып, деткижип чоруңар. Эртемге ынак болуңар! Өөрениринден кажан-даа чалгаараваңар! Доозукчуларга бо чыл – мергежил шилиир эң-не харыысалгалыг чыл. Күзээниңер мергежилди шилип алгаш, эртем-билигни чедип алыңар. Республикавыска талантылыг, профессионал кадрлар херек, доозукчулар! Бөгүн чүгле өөреникчилерге эвес, а башкыларга база онзагай хүн. Хүндүлүг башкылар, бердинген күш-ажылыңар, шыдамык чорууңар, уругларга ынакшылыңар, чаагай сеткилиңер дээш өөрүп четтириишкинниң сөстерин илередирин чөпшээреп көрүңер. Чурттуң келир үези силерниң холуңарда дээрзин утпаңар! – деп кыйгырган.

Бирги классче кирип турар чаштар «Экии, школа!» дээн уткалыг ыры-шүлүү-биле байырлалды каастаан. Билиглер хүнүнүң бирги коңгазын 11 «а» класстың өөреникчизи Тана Донгак биле 1 «б» классче кирип турар Амелия Сенди- оол чайган.

Айдың ОНДАР.
Чуруктарны интернет четкизинден алган.