Тываның Баштыңы Москвага ажылчын сургакчылаашкын үезинде Бойдус ажыглалының адырында хыналда-хайгаарал талазы-биле федералдыг албанның удуртукчузу Светлана Радионова-биле ужурашкан.
Аңаа ийи тала Межегей хөмүр-даш тывыжын шиңгээдириниң айтырыгларын сайгарып, болбаазырадылганың экологтуг талаларынче база бойдус камгалалының нормаларын күүседиринче онза кичээнгейни угландырган.
«Светлана Геннадьевна инвестиция планнарын бойдус камгалалының хемчеглери-биле дүүштүрери чугула дээрзин демдегледи: регионга хөмүр-даш адырын хөгжүдери республиканың онзагай бойдус байлаанга хора чедирбес ужурлуг. Ооң туружун бүрүнү-биле деткип тур мен – деп, Владислав Ховалыг бодунуң блогунда демдеглээн. – Бойдус курлавырларының ажыглакчыларынга экологтуг харыысалганы бедидер, бойдус камгалал хемчеглериниң күүселдезин мониторингилээр ажылды уламчылаар бис».
Ужуражылга үезинде арыглап-аштаар улуг тудугларның байдалынче кичээнгейни углап, оларны чаартыры чугула дээрзин демдеглээн. Владислав Ховалыг бойдус камгалал хемчеглериниң күүселдезинге хыналданы Россияның бойдус хайгаарал албаны-биле кады уламчылаар сорулгалыын дыңнаткан.
Тыва Республиканың Чазааның парлалга албаны.
Чурукту интернет четкизинден хоолгалаан.
“Шын” №36 2025 чылдың сентябрь 18