Тываның күрүне университединиң ботаника садында “Чечекти болгаш чымчак сеткилди белекке бер” деп экологтуг акция доозулган. Ук акцияны “Бистиң бажыңывыс — Чер” деп бойдус камгалаар операция организастаан.
Долгандыр бойдуска хумагалыг болурун хевирлээр, школачыларның, студентилерниң, башкыларның болгаш экологтуг девискээрни тургузар ажылга киржир күзелдиг кижилерниң идепкейин оттурар, ТывКУ-нуң Ботаника садының девискээрин ногаажыдарынче кижилерни хаара тудар сорулгалыг ук акцияны эрттирген.
Университеттиң хөй-ле башкылары, ажылдакчылары, студентилери экологтуг шимчээшкинни деткээн. Акцияга киржиринге беленин Тываның күрүне университединиң хоочуннары илереткен. Галина Дадаа хөй чылдыг георгинниң дазылдарын, Антонина Лайдып борбак согунаның, Ирина Кара-Сал болгаш Надежда Ховалыг ногаа болгаш каасталга үнүштериниң үрезиннерин белекке бергеннер.
ТывКУ-нуң Ботаника садының директору Анета Ооржак башкыларга экскурсияны чорудуп, университеттиң шак бо эртем адырының кол-кол угланыышкыннарының дугайында чугаалаан.
Бойдус-география факультединиң 4-кү курузунуң студентизи Ай-кыс Хертек хөй чылдыг люпин деп үнүштүң рассадазын белекке берген. Кышка шыдамык, чүнү-даа далдавас боорга, ону барык сад бүрүзүнде тарып өстүрүп турар. Частан орай күске чедир өңгүр, чаагай, чаа хевээр хевири-биле садты каастап турар.
“Чечекти болгаш чымчак сеткилди белекке бер” деп экологтуг акция чылдың-на болуп эртер. ТывКУ-нуң Ботаника садының чаагай чаңчылы апаар.
/ ТКУ-нуң медээлеринден алган.
"Шын" №43 2023 чылдың июнь 14