Август — чайның сөөлгү айы. Ол бодунуң адын рим императору Октавиан Августан алган. Бо үеде бойдус өң-баазын өңнери-биле ойнап-даа турза, айның ийиги чартыындан эгелеп чоорту имистелип, чарашпай күске оруун чайлап эгелээр. Ылап-ла, август айда ногаа-чимис, кат-тоорук бышкан, дүжүт ажаалдазы эгелээн, мал-маган семирээн ёзулуг-ла элбек, тодуг ай.
Август ай дугайында улусчу билиишкиннерни көрээлиңер: айның бир дугаар неделязы доктаамал турар болза, кыш узун болгаш харлыг болур; туман дыка үр таравас болза, агаар аязыр; чаъставаска, чылыг болгаш кургаг күс болур; хыраа дүжүптер болза, эрте кыш дүжериниң демдээ; чылыг болгаш шык ай болза, мөөгүнүң дүжүдү элбек болур; дуруяалар август төнчүзүнде чыглып алгаш, мурнуу чүкче өөр-өөрү-биле ужуп чоруп эгелээрге, кыш эрте дүжер.
Август айда төрүттүнгеннер Арзылаң биле Кысчыгаш деп сылдыс демдектеринге хамааржыр. Август 22-ге чедир төрүттүнген болза – Арзылаң, 23 соонда — Кысчыгаштар. Арзылаңнар — боттарының лидер шынарларын көргүзүп чоруур, дыка чоргаар кижилер. А Кысчыгаштар сайгарар угаанныг болгаш ажылгыр, буянныг болгаш бердинген кижилер.
Бо айда төрүттүнген сураглыг кижилер: дизайнер, модельер Ив Сен Лоран, политик, АКШ-тың президентизи Барак Обама, чогаалчы, шүлүкчү Ги де Мопассан, чурукчу Илья Репин, экзотиктиг танцы күүседикчизи Мата Хари, актриса Шарлиз Терон, ыраажы София Ротару, ыраажы Уитни Хьюстон, актёр Антонио Бандерас, кубин революционер, политик Фидель Кастро, полководчу, монарх Наполеон Бонапарт, ыраажы Maдонна, актёр Пьер Ришар, эртемден, математик Пьер Ферма, актёр Роберт Де Ниро, актёр Олег Табаков, француз модельер, «Chanel» мода бажыңының тургузукчузу Коко Шанель, ыраажы Майкл Джексон, актёр Ричард Гир, российжи революционер, политик Феликс Дзержинский, актриса Наталья Гундарева дээш оон-даа өскелер.
Чурукту интернет четкизинден хоолгалаан.
“Шын” №29 2025 чылдың июль 31