Республиканың наркология диспансериниң улуг эмчизиниң оралакчызы Ульяна Биче-оол уругну арага ишпес кылдыр чүге элээди үезинден тура кижизидерин тайылбырлаан.
Элээди үезинде уруг араганы эштериниң аразынга амзаптып болур. Ынчан арага ишкен соонда, эскериглери уттундурбайн артып калыр. Бир эвес бир дугаар араганы ишкен соонда, организминге багай салдарны эскерип каар болза, ону үр үе дургузунда сактып артып калыр. Кажан араганы ишкеш, хөглүг апаар болза, ынчан арагага чаңчыгып, келир үеде аңаа сундулуг кижи апарып болурунуң айыылы бар.
Арага кижини түр када сула салдындырыпкан ышкаш болур. Кажан сергей бээрге, берге айтырыглар чиде бербээн болур. Ооң соонда база катап берге айтырыглардан дезер дээш, эзирик байдалче кириксей бээр. Кижилер шак ынчаар арагага чаңчыгып турар.
Ындыг байдалда чүнү канчаарыл?
Арага ишпезиниң өске аргаларын дилээр апаар. Өскээр чардыгып, өөрүшкүнүң гормоннарын өөскүдер херек. Бир эвес угаан ажылы кылып турар болза, күш-ажыл-биле бодун чардыктырар азы спорт-биле өңнүктежир.
Театр, музей дээн ышкаш культурлуг черлер баарга, шылаанын чидирип, дыштандырыптар.
Кадык камгалал яамызының медээлеринден.
«Шын» №77 2023 чылдың октябрь 11