“Элээр” суурларны шаңнаан

Тываның Баштыңы Владислав Ховалыг 2022 чылда республикага “Элээр суур” мөөрейин чарлаан. Ооң сорулгазы – суурларның чурттакчыларының аразынга арагалаар чорукту чавырылдырары, араганы чажырып садарынга удур демисел.

“Элээр суур” мөөрейниң организакчызы Регионнуң айыыл чок чоруунуң департаментизи ооң түңнелдерин үндүрген. Тиилекчи суурларны илередирде, оларның чурттакчыларының санының аайы-биле бөлүктээн: улуг суурлар – 5 муң чедир чурттакчылыг, ортумак суурлар – 1 муң чедир, бичии суурлар ийи чүстен эвээш чурттакчылыг.

Тиилекчи суурларны илередип тура, арагалаарынга хандыкшылдыг кижилерниң саны кызырылганын, араганы чажырып садар чорук-биле демиселди, чурттакчы чоннуң хууда ажыл-агыйын хөгжүдеринге, хостуг үезин ажыктыг эрттиреринге салдарлыг хөй-ниити ажылды организастааны дээш өске-даа негелделерни барымдаалап көрген.
Бичии суурларның аразынга 3-кү черни Тес-Хемде Куран суурга, 2-ги черни – Тожунуң Чазылар, 1-ги черни Мөңгүн-Тайганың Тоолайлыг суурларга тывыскан. Оларга тус-тузунда 100 муң, 300 муң, 600 муң рубль акша шаңналдарын берген.

Ортумак суурлар аразынга үшкү черни Барыын-Хемчик кожууннуң Бижиктиг-Хая суурга, ийигизин Чөөн-Хемчик кожууннуң Чыргакы, бирги черни Элдиг-Хем суурларга тывыскан. Оларга тус-тузунда 200 муң, 400 муң, 1 миллион рубль акша шаңналдарын берген.
Улуг суурлар аразынга үшкү черни Чөөн-Хемчик кожууннуң Чыраа-Бажы суурга, ийигизин Каа-Хем кожууннуң Кундустуг, бирги черни Кызыл кожууннуң Баян-Кол суурларга тывыскан. Оларга тус-тузунда 400 муң, 500 муң, 1 миллион рубль акша шаңналдарының сертификаттарын берген.

Шаңналга алган акшаны тус черлерниң эрге-чагыргалары элээр чорукту суртаалдаарынга, араганы чажырып садар чүүл-биле демиселге, чон ортузунга хөй-ниити ажылдарын чорударынга болгаш суурларның чаагайжыдылгазынга ажыглаар ужурлуг.
Шаңналдарны тус чер чагыргаларының даргаларынга болгаш төлээлеринге ТР-ниң Чазааның Даргазының оралакчызының албан-дужаалын күүседип турар Виталий Бартына-Сады тывыскан.

/ Бистиң корр.
"Шын" 2023 чылдың апрель 1 №23

#Шын #Тыва #ТываныңБаштыңы #ЭлээрСуур #Мөөрей