«Эзирлер уязы» губернатор төлевилели республиканың аңгы-аңгы булуңнарында боттанып турары билдингир. Ооң кол сорулгазы — суур бүрүзүнге улуг эвес-даа болза, бичежек спорт залдарын тудуп, көдээ черниң оолдар, уругларын спортче хаара тудары. Салган сорулга хүнден хүнче боттанып, Тываның бичии суурларында спорт залдары ажыттынып турар. «Эзирлер уязы» — элээди оолдар, уругларның спортче баштайгы базымнарын кылыр төвү.
Ол ышкаш Чеди-Хөл кожууннуң Элегес сумузунда база өг хевирлиг спорт залының тудуунда ажылдар адакталып турар. Суурнуң Культура бажыңы болгаш чагырга чанынга шагда-ла ажылдавайн барган ажыглал чок турган садыг бажыңын ооң ээзи болур Элегес суурнуң хоочунунуң чөпшээрели-биле бускаш, чурттап олурар бажыңының чанынга көжүрүп чедирип кааннар. Эрги садыг орнун аштап-арыглаар ажылдар база ындыг амыр болбаан. Чүгле ооң таваан бузарынга безин элээн үе негеттинген.
2022 чылдың май айда «Эзирлерниң уязының» тудуу эгелээн. Тудуг ажылынга суурнуң чону эгезинден тура идепкейлиг киржип келген. Сумунуң чагыргазының ол ажылды организастап турганы база онзагай. Кудумчу аайы-биле хуваажып, чайны чайладыр элчип-селчип ажылдап келгеннер. Ол ышкаш сумуда ажылдап турар албан черлерин — эмнелге, клуб, чагырга, школа, уруглар садын база хаара туткан. Организация бүрүзү неделяның бир хүнүнде тургустунган чурум ёзугаар тудугга ажылдап хүнзээр. Элчип-селчир ажылдың кайы хире чоруп турарын хайгаарап, хуваар улус турбайн канчаар. Оларның бирээзи Виталий Монгуш:
«Тудуг эгелээнден бээр мында ажылды уштап-баштап, хүннүң-не ажылдап тур мен. Чамдыкта кижи көвүдеп-даа кээр, чамдыкта эвээжеп-даа каар. Ынчалза-даа чон хүннүң-не үзүктел чок кээп, доктаамал ажылдап турарлар».
Ооң чугаалап турары-биле алырга, тудуг барык доостур четкен. Спорт залының курларын лактаар ажылдар доозулган. Соңгаларын кылыр ажыл база адакталып турар. Чырык болгаш одалга системазын киирери арткан. Арткан ажылдарны дооскаш, октябрь айның төнчүзүнде «Эзирлер уязын» ажыдар дээрзин чагырга даргазы Айдыс Иргит дыңнаткан.
Чаа спорт залының ажыттынарын элегесчилер четтикпейн манап, демниг ажылдап турарлар.
Чыжыргана Саая.
Буян Ооржактың тырттырган чуруктары.