Улуг-Хем кожууннуң Эйлиг-Хем сумузунуң Хая-Ужу деп алдын элезинниг чараш чурумалдыг черге херээжен улус аразынга кожуун чергелиг элезинге ойнаар хол бөмбүүнүң маргылдаазы болуп эрткен. Маргылдаа бо чылын 4 дугаар чыл эртип турар. Ону Эйлиг-Хем сумузунуң болгаш кожууннуң херээженнер чөвүлелдериниң эгелээшкини-биле чорудуп турган. 3–4 дугаар чылында тиилекчи командалар оюнну боттары уламчылап эрттирип эгелээн.
Бо чылгы маргылдаага 35 хардан өрү назылыг херээжен улус аразынга ниитизи-биле 6 команда киришкен. Ол дээрге “Хая-Ужу”, “Тиилекчилер”, “Черликтер”, “Үш-Мөөрүк” болгаш Шагаан-Арыгның командалары база кожууннуң төп эмнелгезиниң эрттирикчи командазы-дыр.
Маргылдаага киржип келген ойнакчыларны тыва кижиниң кужуру изиг-хан, изиг сүттүг шайы-биле Эйлиг-Хем сумузунуң Херээженнер чөвүлелиниң кежигүннери биле эрттирикчи команда шайладып хүндүлээн.
Оюнну эрттиреринге кожууннуң Төп эмнелгези, Эйлиг-Хемниң Херээженнер чөвүлели база ТР-ниң Дээди Хуралының даргазы Каң-оол Даваа улуг үлүг-хуузун киирип, шаңнал акшазынга деткимчезин көргүскен.
Маргылдааның байырлыг чыскаал ажыдыышкынында хөй чылдарда кожуунга хол бөмбүүн сайзырадып, кадык амыдырал дээш өзүп орар салгалга үлегер-чижээн көргүзүп чоруур спортчу кадыннарга хүндүлел бижиктерни Тываның Херээженнер эвилелиниң мурнундан кожууннуң Херээженнер чөвүлелиниң удуртукчузу Сай-Суу Тарыймаа тывыскан. Ол шаңналга Светлана Бүрбү, Шончалай Оюн, Марта Сотпа, Амаа Шожул-оол, Валентина Шожул-оол база Кара Уйнукай төлептиг болган. Ол ышкаш Россияның Херээженнер эвилелиниң мурнундан тускай медальды Эйлиг-Хем сумузунуң Херээженнер чөвүлелин хөй чылдарда удуртуп баштап чоруур удуртукчузу, суму баштыңы Рада Быштак-оолга тывыскан.
Арыг агаарлыг, алдын элезинниг чараш черге маргылдаа бедик көдүрлүүшкүннүг эрткен. Маргылдааның түңнелинде 1-ги черни «Тиилекчилер» командазы, ийигизин Шагаан-Арыгның спортчулары, 3 дугаар черни «Хая-Ужу» командазы алган.
Тиилекчи болгаш шаңнал кирбээн-даа командаларны идепкейлиг киржилгези дээш акша шаңналдарын тывыскан.
Тускай шаңналдарга дараазында ойнакчылар шылгараан: «Эң эки көдүрүкчү» — Кара Уйнукай, «Дески ойнакчы» — Бай-кыс Нава, «Эң эки халдакчы» биле «Тиилелгеже чүткүл» — Руфина Дакыр-оол, «Эң тергиин камгалакчы» — Сылдысмаа Кунга, «Эң улуг ойнакчы» — Светлана Чик-Доржуевна, «Азартыг, солун ойнакчы» — Буянмаа Тулуш.
Валентина Шожул-оол хол белектерин Бай-Кыс Навага, Тамара Донгакка бодунуң өмүнээзинден деткээн.
Оюннар эп-демниг, солун болгаш чараш эрткен. Ойнакчылар, эрттирикчилер сагыш сеткили чиик-чаагай, далай суунга эштип, дыштанып алгаш, шупту сол-менди тарап чанганнар.
Рада БЫШТАК-ООЛ, Эйлиг-Хем сумузунуң Херээженнер чөвүлелиниң удуртукчузу.
Авторнуң архивинден алган чуруктар.
“Шын” №27 2025 чылдың июль 17