Күрүнеден чиигелде-биле кадыкшыл камгалаар барааннар алыр категорияга хамааржыр хамаатыларга эм-таң, тускай медицина барааннары болгаш эмнээр аъш-чем садары-биле Тывага федералдыг бюджеттен немей 11,6 млн рубльди аңгылаан. РФ-тиң Чазааның Даргазы Михаил Мишустин акша-хөреңгини немей бээриниң дугайында дужаалга июль 8-те ат салган.
Документиде тодарадып бижээни-биле, ол дээрге инвалидтерге, Ада-чурттуң Улуг дайынының киржикчилеринге, инвалид-уругларга, чернобыльчыларга социал ачы-дуза чедирилгезиниң акшаландырыышкыны болуп турар. Кижи бүрүзүнге кандыг эмнер, медицина барааны херегин ооң эмнеп турары эмчизи тодарадыр.
«Федералдыг деткимче халас эмнер-биле бир чыл дургузунда барык 3,5 миллион кижини хандырар арганы бээр. Чогуур улуска алыр ужурлуг эмнерин херек үезинде бээри кончуг чугула. Россияның субъект бүрүзүнге ону кичээнгейлиг сагыырын дилеп тур мен» – деп, Михаил Мишустин демдеглээн.
Бистиң корр.
Чурукту интернет четкизинден алган.