ОЧУЛГА
Николай Владимирович ПЕРЕЯСЛОВ – шүлүкчү, литературовед.
Донецк областың Красноармейск хоорайга 1954 чылда төрүттүнген. Донбасстыӊ «Краснолиманская» шахтазынга өөреникчилеп, оон мотористеп база слесарьлап ажылдап чораан.
1993 чылда Москваныӊ А.М. Горький аттыг литература институдунуӊ критика база литературоведение курстарын бот-өөредилге-биле дооскан. «Старицкий Весник» солунга ажылдаан соонда, Самара хоорайга Литература фондузунуӊ область салбырынга директорлаан. 1997 чылда өг-бүлези-биле Самарадан Москваже көже бергеш, Россияныӊ Чогаалчылар эвилелиниӊ секретарынга амга чедир ажылдап чоруур. Оон аӊгыда Москваныӊ журналистер эвилелиниӊ, Журналистерниӊ делегей федерациязыныӊ, Делегейниӊ чогаалчылар база публицистер ассоциациязыныӊ кежигүнү. Эртемниң болгаш уран чүүлдүң Петров академиязыныӊ база Болгарияныӊ Варнада Славян чоннарныӊ чечен чогаал академиязыныӊ чиӊгине кежигүнү.
ЭМНЕЛГЕГЕ
Өлүмден мен дилеп тур мен: бичии мана,
Өршээп көрем, элек иргин, мени алба,
Чайгы чаъстыӊ саарыын көрейн,
Чаагымны кышкы чывар ам-даа шонзун.
Частып келген сиреньнерге ынаам кончуг!
Чаашкын соонда агаар база онза-ла ийин.
Амыдырал – Бурган чаяан виноград ыяжы,
А салбактары – аас-кежик алдын кады.
Шагывыс кээр – бистер шупту аъттаныр бис,
Шаап келбес, дедир чанар оруувус чок.
Ында сирень, чайгы чаъс чок, сеткил өөртүр,
Ынчангаштыӊ хоозургай ээн-не чүве.
Канчалдыр-даа, кайнаар-даа көөрүӊге,
Бурганывыс алдар-ады долуп келир.
Карак четпес ырактыва чоруур душта
Бойдузувус чараш-каазын сактып алыыл.
Орус дылдан Мэңги ООРЖАК очулдурган.
Чурукту интернет четкизинден алган: yandex.ru/images/sea...
“Шын” №28 2025 чылдың июль 24