Республиканың девискээринде национал төлевилелдерниң боттанып турары ооң хөгжүлдезинге улуг ужур-дузалыг. Оларның аразында “Кадык камгалалы” национал төлевилелдиң кадык камгалалының бирги звенозунуң чаартылгазының программазы-биле 3 ультра үн дузазы-биле шинчилге эрттирер аппарат, чурагайлыг рентген аппарады, өкпеге кылымал тындырыышкын кылыр 2 аппарат, шинчилгелер кылыр лабораторлуг дериг-херекселдер, электрокардиографтар болгаш оон-даа өске кончуг ажыктыг дериг-херекселдер саттынган.
Таңды кожууннуң чурттакчы чону ам чурттап турар чериниң аайы-биле электри-биле ажылдаар кардиографка шинчилгени эртип, ырактан кардиограф эмчиниң арга-сүмезин ап, фельдшер-акушер пунктуларынга диспансеризацияның 1-ги чадазын эртип алыр аргалыг апарган.
“Баштайгы эмчи дузазы чедирер системаны хөгжүдери” болгаш “Кадык камгалалының бирги звенозунуң чаартылгазы” деп регионалдыг төлевилелдер-биле Таңды кожуунда 8 ФАП тудуунуң 4-ү доозулган. Ол ышкаш Таңдының төп эмнелгезиниң автопарыгы 85 хуу чаарттынган. Эрткен чылын 4 чаа автомобильди алган.
Национал төлевилелдерниң ачызында суурларының эмнелге албан черлери көскүзү-биле сайзырап турарынга, кижилерниң кадыкшылы дээш сагыш човап турарынга тус черниң чурттакчы чону өөрүп четтиргенин илередип турарлар.
“Кадык камгалалы” национал төлевилелдиң база бир чугула сорулгаларының бирээзи эмнелге албан черлеринде кадрларның чедишпезин узуткаары болгаш эмнелге ажылдакчыларының ат-алдарын бедидери болур. Ол сорулганы чедип алыры-биле аныяктарга мергежил шилип алырынга дээштиг аргаларны ажыглаар херек. Эмнелге албан черлери шак ындыг ажылдарны баш удур чорудуп, келир үениң эмчилерин школадан тура белеткээри-биле боттарының шөлчүгештеринче чалап турарлар.
Школачыларга эмнелгениң төп кезиишкин блогун, хирургия, терапия, бичии уруглар чыдар салбырларны, хөй ажыл-хүлээлгелиг төп лабораторияны, поликлиниканы көргүзүп, таныштырып, экскурсияны доктаамал чорудуп турар.
Өөреникчилер боттарының ээлчээнде амгы үениң дериг-херекселдерин сонуургап көрүп, ак халатты-даа кедип шенээннер. Эмчилер боттары тус-тузунда аныяк-өскенге боттарының ажыл-мергежилин таныштырып турарлар. Амгы үеде эмнелгеде специалистерниң чедишпезин шак мындыг хемчеглер узуткаар дээрзинге идегел бар.
Чыжыргана СААЯ.
Чуруктарны интернеттен алган
“Шын” №29 2024 чылдың апрель 17