Бир дугаар регионнар аразының “Енисей Сибириниң легендалары” мөөрейге Тывадан киришкен Таңды, Кызыл кожууннарның аас чогаал коллективтери тиилекчилер болган.
Енисей губерниязының 200 чылдаан оюнга тураскааткан конкурстуң тиилекчилеринге дипломнар болгаш белектерни январь 18-те Улусчу чогаадылга бажыңынга байырлыг байдалга тывыскан.
Болган конкурска Красноярск край, Тыва болгаш Хакасияның чурттакчылары киришкен. Тиилекчилерни хар-назы аайы-биле бөлүктеп, аңгы –аңгы номинацияларга илередип үндүрген. Бир дугаар эрткен конкурстуң организакчылары Орус географтыг ниитилелдиң Красноярск крайда салбыры болган.
Тываны төлээлеп киришкен коллективтерниң бирээзи Кызыл кожууннуң Уругларның уран чүүл школазының “Хорагай” аас чогаал бөлүү, өскези- Таңдының А.Сагды аттыг кожууннуң культура бажыңының “Таңды-Уула” аас чогаал ансамбли. Олар “Этниктиг аялга (ыры) деп номинацияга улуг улустар аразынга тиилээн:
-I-ги черни – “Хорагай” аттыг Кызыл кожууннуң Уругларның уран чүүл школазының коллективи;
- II-ги черни- Таңдының А.Сагды аттыг кожууннуң культура бажыңының “Таңды-Уула” аас чогаал ансамбли алган.
Республиканың улусчу чогаал төвүнүң директору Елена Ондар тиилекчилерге байыр чедиргеш, чаалап алган шаңналдарын байырлыг байдалга тывыскан.
Сорунза Монгуш
ТР-ниң Культура яамызының медээзи-биле.
Енисей Сибириниң легендалары
20 января 2023
41