Эпидемиологтуг байдал

Тыва Республикада чидиг респираторлуг вирус халдавырлары (ОРВИ) болгаш грипп аарыы эпидемияның деңнелинден 46,6 хуу куду. Тываның Чазааның Аппарат хуралынга Росхереглелхайгаарал албанының республикада эргелели эрткен неделяның ындыг сан-чурагайларын дыңнаткан. Эрткен неделя дургузунда республикада ОРВИ-ден – 869, грипптен аараан 21 таварылга бүрүткеттинген.
Республикада социал болгаш өөредилге албан черлеринге аарыгларның тарап нептерээрин болдурбас дээш, хүннүң-не мониторингини чорудуп турар.
Бии-Хем, Сүт-Хөл, Улуг-Хем кожууннарның өөредилге черлери амгы тургустунган эпидемиологтуг байдалды барымдаалап, хөй-ниити хемчеглерин кызыгаарлап, өөреникчилерни ырактан өөренир кылдыр түр када шилчидерин сүмелээн. Тываның Чазааның Даргазының оралакчызы Орлан Сарыглар бир эвес школада элээн хөй өөреникчилер өөренмейн турар болза, хөй-ниити хемчеглерин соксадып, ырактан өөредилгеже шилчиирин боттары шиитпирлеп болур дээрзин айыткан.
Бир эвес уруглар садында чаштарның 20 хире хуузу грипп азы ОРВИ-ден аараан болза, ол ышкаш 1-2 дегдирген таварылга илереттинзе, албан черин карантиннээр.
Школаларга хамаарыштыр алырга, уругларның 20 хуузу аарып, дегдирген 1-2 таварылга илереттинер болза, класска кызыгаарлаашкын хемчеглерин киирер. Бир эвес ОРВИ уржуундан өөреникчилерниң 30-ден хөй хуузу өөренмейн баргаш, 8-10 хире пневмониялаан таварылгалар бар болза, бүдүн школага карантинни чарлаар.
Бистиң корр.
Чурукту ТР-ниң Чазааның парлалга албанындан алган.
“Шын” №47 2025 чылдың декабрь 4