Республиканың үер-чайык соонда үрелиишкинге таварышкан оруктарында септелге ажылдары уламчылап турар. Ол ажылдарны ТР-ниң орук-транспорт комплекизиниң сайыды Шораан Чыргал-оол хууда контролюнда алган. Үрелиишкиннерлиг орук объектилеринче оперативтиг үнүүшкүннүг хуралдарны чорудуп турар.
2023 чылдың июнь 17-ниң байдалы-биле Өвүр, Мөңгүн-Тайга кожууннарда ийи орукта көвүрүглерни катап тургускан. Өске черлерде ажыл уламчылап турар. Түр каданың оюп эртер дараазында оруктарын кылган:
- Кара-Хөл суурже чүгле бедик машиналар эртип шыдаар орукту ажыткан. Алаш хемни кежир көвүрүгже 58 дугаар километрде орукту суг үрээн. Ында Ак-Довурактың орук ажыл-агыйының ажылдакчылары экскаватор, КАМАЗ-тар болгаш автогрейдерлер-биле септелге ажылдарын чорудуп турар.
- Чадаана-Ийме аразында оруктуң байдалы чүгээртээн. 7 дугаар километрде суг алган орукту оюп эртер черни “Строй-Экспресс” КХН-ниң орукчулары кылган.
- Чадаана-Бажың-Алаак аразында орук чүгээр байдалда. 5+450 километрде оюп эрте бээр орук бар.
- Суг-Аксы- Алдан-Маадыр аразында орук база чүгээртээн. 7+800 километрде оюп эрте бээр орук бар.
- Суг-Аксы-Ишкин аразында орук база сугга алыскан. Кол орук амдыызында хааглыг, ындыг-даа болза 0+10 километрде оруктуң солагай талазында оюп эртер черни кылган. Ында “Строй-Экспресс” КХН-ниң орукчулары доктаамал режимде орукту хынап турар.
- Ак-Тал суурже оруктуң 15+900 – 16+100 километринде үер соонда хөй оңгарлар тыптып келгени-биле, ону ояр орукту кылган.
- Суг-Аксы – Баян-Тала аразында 0+000 – 3+500 километринде өске орукту кылган.
Абакан-Ак-Довурак аразында автоорук түр када хааглыг. Ол оруктуң 358 километринде Ак деп хемниң суу көдүрүлген соонда, көвүрүг бетинде эрик чирилген.
Улуг-Хемни кежир “Эйлиг-Хем” паром кежии ажылдавайн турар.
Үрелиишкиннерлиг орук участоктарында, көвүрүглерде септелге ажылдары дүн-хүн дивейн уламчылап турар. Ынаар 50 орук техниказын болгаш 100 ажыг орукчуларны хаара туткан.
Оруктарга үер-чайыктың чедирген когаралын үндүрер ажыл база уламчылавшаан. Ол когаралды дуглаары-биле РФ-тиң курлавыр фондузундан немелде акшаландырышкын дилээри-биле Федералдыг орук агентилели санаашкыннарны чорудуп эгелээн.
“Тыва Республиканың автооруктар эргелели” ККЭ-ниң диспетчер албаны оруктарның болгаш сугнуң байдалын дүн-хүн дивейн хынап турар. Автооруктарда байдал доктаамал өскерлип турары-биле, тургустунуп келген бүгү айтырыгларны дараазында телефоннарже долгааш, тодарадып ап болур:
8 (39422) 2-11-08 (доб.205); сот. 8-929-358-09-11.