ТР-ниң культура сайыды Виктор Чигжит Барыын-Хемчик болгаш Сүт-Хөл кожууннарда капиталдыг септелге чоруп турар культура албан черлерин хынап четкен.
Бо чылын федералдыг акшаландырыышкын-биле Эрги-Барлык, Алдан-Маадыр суурларның Культура бажыңнарында капиталдыг септелгени чорудуп турар. Планда көрдүнгени ёзугаар июль айның төнчүзүнде доозар дээн ажылдар озалдаашкын чок уламчылап турар. Амгы үеде иштики ажылдарын кылып турар, айыткан хуусаада септелгени доозуптар дээрзин ажылчыннар дыңнаткан.
Оон аңгыда, сайыт Кызыл-Мажалыкта кожууннуң төп ном саңынга база четкен. Ында федералдыг болгаш республика бюджединден акшаландырыышкын-биле амгы үеге дүүштүр чаартылгаларның кандыг бадалда кылдынып турарын база көрген.
Сүт-Хөлдүң Кара-Чыраа суурда "Сорунза" губернатор төлевилели-биле туттунуп турар көдээ Культура бажыңының тудуу барык адакталып турар. Культураның чаа туттунган оран-савазының байырлыг ажыдыышкынын август айда эрттирер деп планнап турар.
Ол-ла сургакчылаашкын үезинде Ишкин суурда үерден когараан 8 культура ажылдакчызы-биле сайыт ужурашкан. Оларга дуза кадары-биле чооку үеде Сүт-Хөл кожууннуң артистериниң киржилгези-биле ачы-дуза концертин эрттиреринге эптиг концерт залын халаска бээрин шиитпирлээн. Ол концерттен кирген орулганы Ишкинниң үерден когараан культура ажылдакчыларынга кышка белеткенип алырынга дузаламчы кылдыр үлеп бээр дээн.
/ ТР-ниң Культура яамызының медээзи.
"Шын" №46 2023 чылдың июнь 24