Вадим Соянның шериг албан-хүлээлгезиниң күүселдези 2006 чылда, кажан ол Эрзин ортумак школазын доозупканда, эгелээн. Хуваалда ёзугаар Ыраккы Чөөн чүкке баргаш, аңаа сапёрнуң ажыл-херээнге өөренген.
Шериг албанының соонда Томскуда педагогика колледжизинче дужаап киргеш, ону «Юриспруденция» деп мергежилдиг дооскан.
Бокска хандыкшаан аныяк оол аал-оранынче ээп чанып келгеш, Эрзин кожууннуң уругларның болгаш элээдилерниң спортчу школазынга тренер башкы болуп ажылдай берген. Аңаа ол барык он хире чыл ажылдаан.
2021 чылда Вадим Соян Россия Федерациязының Чепсектиг Күштери-биле керээ чарып алгаш, бистиң чурттуң Ыраккы Чөөн чүгүнге шериг албанын эрттирери-биле аъттаныпкан. Аңаа баргаш, АГС гранатометтуң улуг шыгаакчызы албан-дужаалга томуйлаткан.
Тускай шериг операциязы эгелээн соонда, сержант Соянның салбыры Изюм угланыышкынга дайынчы хөделиишкиннерге киржип турган. Чурттакчылыг чер, бичежек арга дилиндээ бүрүзү дээш изиг тулчуушкуннар чоруп турган. Чоок хемчээлге гранатомет ажыглаары болдунмастай бээрге, ону автомат азы пулемет солуп турган.
Бир аар-берге тулчуушкуннуң соонда сержант Вадим Соянны күрүне шаңналынга киирген турган. Ынчалза-даа маадырлыг гранатомётчу ону ап четтикпээн, будунуң довуунче балыглаткан, а ол ышкаш кемдээшкинни алган. Ооң соонда госпитальга үр үеде эмнедиишкин. Баштай колдуктааштар, а ооң соонда даянгыыш дузазы-биле дагын катап кылаштап өөренген. Шеригден халашкан соонда, халажылгада сержант төрүттүнген черинче ээп келген, мында төрээн агаары безин эмнээр болгай.
Шаңналче киирип турганының дугайында Вадим уттупкан турда, Тыва Республиканың шериг комиссариады ооң шаңнатканы “Эрес-дидим чорук дээш” деп дайынчы медаль чедип келгенин дыңнаткан.
Октябрь 24-те дайынчыларның кончуг үнелээри шаңналдарының бирээзин маадырга тывыскан.
/ ТР-ниң Шериг комиссариадының медээзинден А. ХЕРТЕК белеткээн.
“Шын” №84 2023 чылдың ноябрь 4