Россияда чылдың-на декабрь 9-та Ада-чурт Маадырларының хүнүн демдеглеп турар. Ону «Дайынчы алдар хүннериниң болгаш Россияның тураскаалдыг хүннериниң дугайында» Федералдыг хоойлунуң 1-1 чүүлүнче өскерилге киирериниң дугайында” 2007 чылдың февраль 28-те 22 дугаарлыг Россияның Федералдыг хоойлузун хүлээп алган.
Байырлалдың төөгүзү 18 чүс чылда-ла эгезин алган. Ону Екатерина II үезинде болган шылгараңгай болуушкуннарга тураскааткан — 1769 чылда ол Ыдыктыг Георгий Тиилекчиниң орденин үндезилээн. Ооң-биле тулчуушкуннарга эрес-дидимин көргүскен дайынчыларны шаңнап турган.
Декабрь 9-та, Ада-чурт Маадырларының хүнүнде, Федералдыг суд приставтарының Тывада эргелелиниң тускай даалга күүседир салбырының ажылдакчылары Солаңгы Саая, Айдың Куулар болгаш Эртине Сарыглар Кызылдың 17 дугаар школазының эге класс өөреникчилеринге “Эрес-дидим чорук кичээлин” эрттирген. Аңаа суд приставтары “Ногаан берет” деп темага солун таныштырылганы чоруткан.
Кичээл үезинде өөреникчилер суд приставтары деп кымнарыл, кандыг ажыл чорудуп турар улус чүвел дээрзин билип алганнар. Оон аңгыда, “Ногаан берет” деп чүл, ону кандыг чедиишкиннерлиг улус кедер чүвел дээрзин суд приставтары уругларга тодаргай тайылбырлап бергеннер.
Кичээлдиң төнчүзүнде суд приставтары школачыларга боттарының кылып чорудуп турар ажыл-агыйынга кандыг бергедээшкиннер таваржып кээриниң дугайында болгаш кеткен хевин, ок-чепсээн көргүзүп, ону кандыг үеде ажыглаарын, аргалыг-ла болза, ок-чепсекти ажыглаар үе турбас болза эки деп демдеглээннер.
“Өөреникчилер кичээл үезинде дыка улуг сонуургалдыг болгаш кончуг кичээнгейлиг болдулар. Шак мындыг эрес-дидим чоруктуң кичээлдерин удаа-дараа эрттирери чугула. Чүге дээрге күрүнези, чону дээш ажылдап чоруур улустуң күш-ажылын үнелеп билир салгалды кижизидеринге дыка дузалыг” — деп, Айдың Куулар чугаалаан.
Бистиң корр.
Федералдыг суд приставтарының Тывада эргелелиниң парлалга албанының чуруу.
“Шын” №95 2024 чылдың декабрь 11