Сүт-Хөлдүӊ Кызыл-Тайга суурунуӊ почтачызы Ульяна Ондар – чонунуӊ хүндүткелин чаалап алган ховар кижилерниӊ бирээзи. Ол почта харылзаа адырынга 27 чыл ажылдаан.
Ульяна Шулуун-ооловна – аныяктарныӊ мерген угаанныг сүмелекчизи, улуг назылыг кижилер-биле эп-чөптүг чугаалажыр идегелдиг өӊнүү.
Алды ажы-төлүн төрээн чуртунуӊ төлептиг кижилери кылдыр өстүрүп кижизидип каан. Оон аӊгыда, стол теннизи биле волейбол маргылдаазынга, спортчу хемчеглерге үргүлчү киржир, хөй-ниитиге ажыктыг ажылдан черле чалданмас.
Авазыныӊ үлегери-биле ооӊ өг-бүлези, уруг-дарыы ачы-буянныг ажыл-херек кылырынга чүткүлдүг апарган. Амыдырал аайы-биле берге байдалга таварышкан, ажыл кылып шыдавас кижилер дээш сагыш човап, оларга дузалажып чоруур.
Эриг баарлыг үлегерлиг ава амгы үеде Кызылдыӊ өг-бүлеге болгаш чаштарга социал дуза чедирер төвүнде кижизидикчи башкыныӊ дузалакчызы болуп ажылдай берген. Чылыг холдуг, чымчак сөстүг ие кижи бир-ле чаштыӊ амыдыралынга чырыкты сөӊнээр боор.
ТР-ниӊ Күш-ажыл яамызыныӊ медээзинден.
“Шын” №91 2024 чылдың ноябрь 27