Эртинени кагбаал

Дөрбет, хакас, шор, нанай биче чоннар
Төрээн дылын уттуп каапкаш, ыглажып чор.
Тыва чонга ындыг айыыл келбезин дээш,
Тыва дылдың ээзи бистер чүнү канчаал?

Тыва уруг төрүттүнүп келирге-ле,
Тывалажып чугаалажып эгелээли.
Оон дээре арга черле тывылбас-даа,
Ону шупту тыва улус угаап бодаал.

Ээзи дылын салгалынга өөретпеске,
Эвээш үе дургузунда уттундургаш,
Эгиттинмес каража бооп, олчаан чидер –
Эртиневис тыва дылды черле кагбаал.

Нациязының төрээн дылын билир боору –
Аңгы чон бооп артарынга магадылал.
Ынчангаштың тыва дылды ажы-төлге
Ынай чаштан чугааладып өөредип каал.

Арнын көөрге, азиат деп билдинзе-даа,
Аймак-сөөгү чогум кымыл, чүүден билир?
Тыва мен деп өске чоннар аразынга
Шынзыдыптар күштүг чепсээң– дылың кагба.

Анчымаа ХЕРТЕК, хоочун башкы.
Бай-Тайга кожуун.

“Шын” №82 2023 чылдың октябрь 28